Дар шоҳроҳи Зуғар-Дарвоз садамаи автомобилӣ рӯй дода, боиси марги 5-нафар аз як авлод гаштааст. Ин садамаи хунин дар ҳоле рӯй дод, ки ин хонавода тӯй доштанд ва барои хариди тӯйёна ба сафар баромада буданд...

Аз сар задани ин фоҷиа ҷигарсӯз Малика Урфонзода дар саҳифаи фейсбукиаш хабар дода, навиштааст, ки як авлоди калони Асоевҳо, аз ҷумла Асоев Садр, Асоев Панҷшанбе ва боз 3-нафари дигар ба коми дарёи Панҷ рафтаанд. Ҷасадҳои қурбониёни садамаро то ҳол пайдо накардаанд.
Ҳодиса дар шоҳроҳи Зуғар-Дарвоз рӯй дода, мошин ба дарёи Панҷ, ки яке аз калонтарин дарёҳои Тоҷикистон ба шумор меравад, меафтад. Амвоҷи пуртуғёни Панҷ дар як лаҳза мусофирони мошинро, ки 5-нафар ва ҳама аз як авлод будаанд, ба комаш мекашад.
Малика Урфонзода мегӯяд: “Рӯзи якшанбе тӯйи додарам буд. Сарояндаҳо, хешу табор, ёру дӯстон ҳама ба маҳфил даъват шуда буданд, аммо якбора ин фоҷиа ба сари авлоди мо омада, тӯй ба мотам табдил ёфт...”
Хешу ақрабои арӯсак, ки бояд рӯзи якшанбе ба тахти бахт менишаст, хун мегирянд, зеро ҳалокшудагон хешу табори наздикашон буданд. Ҷустуҷӯи ҷасади 5-нафар қурбониёни ин садамаи хунин идома дорад, аммо дарёи Панҷ мисли аждар қурбониёнашро аз коми худ берун кардан намехоҳад...