Дар деҳаи Мадовраи Панҷакент як арӯсаки 6-моҳаро хушдоман ва хоҳаршӯяш бераҳмона ба қатл расонидаанд. Да ин бора ҳамдеҳагони марҳум ба мо хабар доданд.

Мегӯянд, зиндагии Наргис дар хонадони шавҳараш ба дараҷае вазнин буд, ки ҳатто нони хӯрдан намеёфт. Дар моҳи шарифи рамазон чанд маротиба ин келинчаки бетолеъ аз ҳамсояҳо зорӣ намудааст, ки ба ӯ як пора нон диҳанд, чанд рӯз боз чизе ба даҳон набурдааст. Ягона шахсе, ки дар хонаи шавҳараш Наргисро дилбардорӣ медод, бародари шавҳараш буд. Додаршӯяш чанд маротиба ба Наргис маслиҳат додааст, ки баромада равад, аммо дар ҷавоб келинчак мегӯяд, ки ӯ бо либоси сафеди арӯсӣ ба ин хонадон қадам гузоштаву танҳо бо кафани сафед аз ин даргоҳ бадар хоҳад рафт.

Оқибати сабӯрии арӯсак ҳамин шуд, ки шоми 12-уми июн хушдоман ва хоҳаршӯяш ӯро дар оғилхона зада сиёҳу кабуд кардаанд ва баъди мурданаш хостаанд ба дор овезанд.

Шоҳидони ҳол мегӯянд, модаршӯяш Гулбарг ва хоҳаршӯяш Сайёра- Наргис ро аввал бо зоғнӯг (метин) мурданивор зада, баногӯшашро кафондаанд, сипас хостаанд ҷисми беҷони арӯсакро ба дор овехта, ҳодисаро ҳамчун худкушӣ нишон диҳанд ва ҷони худро аз ҷавобгарӣ озод созанд, аммо бо амри худованд тирашон хок хӯрдааст. Писари амаки Наргис усто буда, дар хонаи ҳамсояи онҳо кор мекардааст. Садои доду фиғонро шунида вай зуд ба ҳавлии хушдомани Наргис медавад ва бо чашмони худ мебинад, ки хушдоману хоҳаршӯяш Наргиси хунолудро дар оғилхона ба дор овехта истодаанд. Азбаски арӯсак аллакай мурда буд, писарамакаш хоҳаршӯй ва хушдоми Наргисро аз дар берун карда, дари оғилхонаро маҳкам мекунад ва ба аҳли оилаи арӯсак ин хабари шумро мерасонад.

Ба гуфти шоҳидон вақте, ки намояндагони мақомоти тафтишотӣ барои санҷиши ин қазия меоянд, додаршӯи Наргис бо чашмони гирён фиғон кашида мегӯяд: Янгама апаю очам куштанд!

Наргис Юнусова аслан зодаи деҳаи Артучи Панҷакент буда, бо амри тақдир аввали соли 2019 ба деҳаи Мадовраарӯс шуда омадааст. Ҳамсараш Шукурмурод даҳмарда буда, аз рӯйи овозаҳо бо як зани шавҳардор муносибатҳои ошиқона доштааст.

Наргис чормоҳа ҳомиладор буд, аммо хушдоманаш ӯро зӯран ба назди духтури занона бурда, маҷбур месозад, ки тифли батнашро исқоти ҳамл намояд. Наргис бисёр мехост лаззати модар шуданро бичашад, аммо модаршӯй ва хоҳаршӯяш, ки ду маротиба шавҳар карда, ҷудо шудааст, нагузоштанд, ки орзуи ӯ амалӣ гардад.

Пайвандони ин арӯсаки ормонӣ дар марги Наргис танҳо хушдоман ва хоҳаршӯяшро гунаҳкор меҳисобанд, аммо тафтишоти қазия ҳанӯз идома дорад.

Аз рӯйи баъзе овозаҳо хушдомани Наргис ҳатто баъди марги фоҷиавии арӯсаки шашмоҳа низ аз аспи ғурур нафаромада ба пайвандони келини ҷавонмаргаш гуфтааст, ки мурдаатонро гирифта зуд аз хонаи ман дафъ шавед! Мурд хуб шуд, ягон кас маро гунаҳкор карда наметавонад! Мегӯянд панҷ сол қабл келини хоҳари хушдомани Наргис низ худро ба дор овехта буд. 

Ёдрас мешавем, ки вақтҳои охир куштори бераҳмонаи занон аз ҷониби пайвандони шавҳар торафт меафзояд. Марги Наргис Юнусова дар як ҳафтаи охир сеюмин фоҷиаи хонаводагист, ки ба вуқуъ мепайвандад. Вақти он расидааст, ки ҷомеа дар маҷмуъ ба муқобли ин вабои нав бархоста, пеши роҳи куштор ва худкушии занону духтарон гирифта шавад, вагарна ин мараз боз ҳам бештар доман паҳн хоҳад кард...