Тавре ки муштариёни сомонаи “Oila.tj” огоҳӣ доранд, чанд рӯз қабл дар деҳаи Мадовраи шаҳри Панҷакент Наргис ном арӯсаки шашмоҳаро хушдоман ва хохаршӯяш бераҳмона ба қатл расонида, баъдан ба дор овехта буданд.
Чанд лаҳза қабл яке аз сокинони деҳаи номбурда бо хабарнигори сомонаи “Oila.tj”дар иртибот шуда, бо шарти пинҳон доштани ному насабаш хабар дод, ки намояндагони мақомоти ҳифзи ҳуқуқ хушдомани Наргиси ноком-Гулбарг Оқиловаро ба бозпурсӣ даъват намудаанд. Аз тарси он ки сирраш фош гашта, боқимондаи умрашро дар пушти панҷараи маҳбас мегузаронад, хушдомани келинкуш қасди худкушӣ намуда, заҳр хӯрдааст.
Ба қавли ин мард Гулбарг Оқилова бо мақсади худкушӣ як навъ дорӯи зидди ҳашаротро, ки барои кирм накардани себ ва дигар дарахтон дар фасли баҳор ба ниҳолҳо мепошанд, нӯшидааст. Аз ин ҳодиса аҳли оила ва ҳамсояҳо хабардор гашта, Гулбарг Оқиловаро ба беморхона мебаранд. Табибон меъдаи кампирро шуста, ҷони ӯро аз панҷаи аҷал раҳоӣ бахшидаанд, вале вай аз зинда монданаш хурсанд нест.
Дар деҳа овозае паҳн гаштааст, ки гӯё хоҳаршӯйи Наргиси ҷавонмарг-Сайёра дар пурсиши нахустин ба гуноҳаш иқрор шуда ба кормандони мақомоти ҳифзи ҳуқуқ гуфтааст, ки ману модарам ҳамеша келинро мезадем, вале ягон чиз намешуд. Хайронем, ки чаро ин дафъа Наргис якбора мурда монд....
Дар байни мардуми деҳаҳои Артуч ва Мадовра миш-миш аст, ки куштори келинаш нахустин ҷинояти содир намудаи Гулбарг Оқилова набуда, ин зан чанд сол пеш ба падаршӯяш заҳр дода, кушта будааст.
