НОМИ ПИСАРОНА
Номномаи Исломӣ | Номҳои писарона бо ҳарфи "Ҷ"
347
1

– Ҷ –

 

ҶАББОР а. جبار 1. соҳиби тавоноӣ ва қудрат («ФЗТ»); мусаллат, қоҳир, қодир («Амид», «ФНЭ»); марди баландқомат ва қавӣ («Муъин», «Мунтаҳо», «Нозим», «Онандроҷ», «Деҳхудо»);

Қавме бошавкат, ҷаббор буданд ва аксари рӯи заминро бигрифтанд. («Маҷмаъ-ул-ансоб»)

2. бисёр ҷабр ва зулмкунанда, золим («ФЗТ»);

Подшоҳи бузург ва ҷаббор бар чокаре хашм гирифтӣ, ӯ он чокарро лат задӣ ва фурӯ гирифтӣ. («Таърихи Байҳақӣ»)

3. подшоҳ («Деҳхудо»); шоҳ, амир;

4. дур аз офат ва комгор; 

5. ниг. Абдулҷаббор.

ҶАБРАИЛ а. جبریل фариштаи муваккали Худо, ки ба пайғамбарон паёми илоҳӣ меорад, Суруш; ном аст барои мардон.

ҶАВШАН جوشن зиреҳ, навъе аз либоси оҳанин барои ҷанговарон.

     ҶАВОД -  جواد сахӣ, саховатманд, ҷавонмард

ҶАЛИЛ а. جلیل 1. бузург, азим; боазамат («ФЗТ», «ФНЭ», «Мунтахаб»); бузургвор («Фарҳехта», «Дурҷ»); муҳтарам («Амид»); бузургқадр («Мунтаҳо»); он ки қадру мартабаи вай баланд бошад («Нозим», «Деҳхудо»);

2. бошукӯҳ («Фарҳехта», «Дурҷ», «Муъин»); 

3. озмудаи куҳансол («ФНЭ»); калонсол («Деҳхудо»); 

4. озмудакор, таҷрибадор, соҳиби таҷриба;

5. ниг. Абдулҷалил. 

ҶАЛОЛ а. جلال 1. бузургӣ, азамат, шукӯҳ («ФЗТ», «Муъин», «Фарҳехта», «Дурҷ»); бузургворӣ («Амид»); иззат («Амид», «Фарҳехта», «Дурҷ»); ҷоҳ («Ф.Ҷомӣ»); сарафрозӣ, қудрат, шавкат («ФНЭ», «Мунтахаб», «Деҳхудо»); калонӣ, рутба, мартаба.

2. пуриқтидор, қавӣ, зӯр («Ф.Ҷомӣ»); қувват, қудрат; ниг. Абдулҷалол.

ҶАЛОЛУДДИН а. جلال الدین 1. мӯҷиби азамати оин («ФНЭ»); 

2. Ҷалолуддин Муҳаммади Балхӣ, маъруф ба Мавлавӣ, шоири номдор ва бузурги қарни ҳафтуми ҳ.қ. («ФНЭ»). 

ҶАМИЛ а. جمیل 1. зебо, хушрӯй, соҳиби ҳусн, ҳасан;

2. мақбул, писанд, писандида, дилкаш;

3. соф, афиф, пок, орӣ аз нопокӣ, тоза, беғаш; 

4. ниг. Абдуҷамил.

ҶАМОЛ а. جمال 1. хушрӯӣ, зебоӣ, ҳусн («ФЗТ»); зебо будан, некӯсурат ва сират будан, хушсуратӣ («Фарҳехта», «Дурҷ», «Муъин»); ҳусни сурат, хубӣ, хушгилӣ («Амид»); хуб шудан ва хубии сурат ва сират («Мунтахаб»); хубсурат ва нексират гардидан («Мунтаҳо»); некӯӣ («Муҳаззаб-ул-асмо»); авранг, («Деҳхудо»);

2. рӯй, чеҳра; дидор («Ф.Ҷомӣ»);

3. ниг. Абдулҷамол.

ҶАМОЛУДДИН а. جمال الدین зебоии оин; ном барои мардон. 

ҶАМШЕД جمشید 1. дурахшон ва рӯшан («ФЗТ»); 

2. номи писари Таҳмурас ва севумин подшоҳи пешдодӣ дар «Шоҳнома»

    ҶАСУР - جسور далер, шуҷоъ, нотарс, пурдил

 ҶАҲОН جهان олам, дунё, гетӣ («ФЗТ», «Амид», «Ф.Шоҳнома»); олам аз замин ва карроти осмонӣ («Деҳхудо», «Фарҳехта», «Дурҷ»); он чи таҳти кураи қамар аст; кураи замин («Фарҳехта»); замин («Муъин» 357). 

ҶАҲОНГИР جهانگیر 1. гирандаи ҷаҳон, подшоҳе, ки кишварҳои бузург бигирад («Амид»); тасхиркунандаи ҷаҳон, кишваркушо, фотеҳ («Ф.Ҷомӣ»); фатҳкунандаи дунё, ҷаҳонгушо («Деҳхудо»);

2. касе, ки шуҳраташ ба тамоми нуқоти ҷаҳон бирасад («Амид»). 

ҶАЪФАР а. جعفر 1. наҳр, рӯд («Амид», «Муъин»); 

2. ба маънии ҷӯйи хурд («Fиёс»); ҷӯйи кӯчак («Деҳхудо»);

3. ҷӯйи бузург, ҷӯйи калон («Мунтаҳо»); ҷӯйи калони фарох («Ақраб-ул-маворид»); 

4. ҷӯйи пуроб («Мунтаҳо», «Деҳхудо»); 

5. ноқаи пуршир («Амид»);

ҶОБИР -  جابر ҷабркунанда, ситамгар

ҶОВИД جاود 1. абадӣ, ҳамешагӣ; доимӣ («ФЗТ», «Фарҳехта», «Дурҷ»); 

2. ба таври абадӣ, ҳамеша, доимо («ФЗТ»); поянда, пойдор, доим («Амид», «Бурҳон», «Деҳхудо», «Муъин»); муддати ҳамеша ва доим ва замони номунтаҳое дар мустақбал аст («Анҷуманоро»); холид, боқӣ, ҷовидона.

3. дер боз («ФЗТ»).

ҶОВИДОН جاودان абадӣ, ҳамешагӣ, доимӣ («ФЗТ»); ҷовид, ҳамеша, поянда, пойдор, доим («Амид», «Бурҳон», «Деҳхудо»).

ҶОВИЗ جاویز ҳамешагӣ, поянда, бемарг.

      ҶУМЪА а. جمعه ном барои мардон; 1. маҷмӯа; як мушт аз хурмо («Ақраб-ул-маворид», «Мунтаҳо», «Деҳхудо»); 

2. улфат («Деҳхудо»); дӯстӣ.

3. ҳафта («Амид»); рӯзи одина, рӯзи пеш аз шанбе («ФЗТ»); ҳафтумин рӯзи ҳафтаи мусулмонон («Муъин»).

ҶУНАЙД а. جنید яке аз урафо ва машоихи сӯфия дар қарни севуми ҳиҷрӣ, ки баъд аз Зуннуни Мисрӣ усули ақоиди сӯфияро шарҳ дода. Мегӯянд, аслан эронӣ ва мулаққаб ба Саййидуттоифа буда («Амид»); Ҷунайди Бағдодӣ (ваф. 910) яке аз аввалин бузургони тасаввуф («Ф.Ҷомӣ»). 

ҶӮРА جوره калимаи ҳиндуориёист ва ба маънои ошно, дӯст, рафиқ; ном барои мардон. 

Хабарҳо дар шабакаҳои иҷтимоӣ:
Шарҳ
(1)
Чонофарид 2020-01-30, 00:25
Мехохам маъноша фахмам
Посух
Шарҳ