Ниқоб
Келинчаки панҷакентӣ: 4 сол шуд дар хонаи шавҳар бокираам (аудио)
7237
17

 

“Аз тӯямон 4 сол гузашт, вале ман ҳанӯз бокираам” мегӯяд қаҳрамони мо.

Исмам Шаҳло, зода ва истиқоматкунандаи Панҷакент мебошам. Маро мушкилии хонаводагиям маҷбур сохт, ки коғазу қалам ба даст гираму диламро холӣ кунам.

Қонунҳои нонавиштаи деҳот

Зиндагии мардуми куҳистон  қоидаҳои худро дорад, хусусан масъалаи хонадоршавӣ дар байни мардуми деҳот масъалаи  хеле нозук аст ва духтарони деҳотӣ  баъди ба шавҳар баромадан ба хотири бахт ба душвориҳои сахт тоқат мекунанд, аммо…
4- сол пеш бо ҷавоне, ки дӯсташ медоштаму ошиқи зораш будам, хонадор шудам. Мо то рӯзи тӯй тариқи телефон гап мезадем ва мудом аз аҳволи ҳамдигар пурсон мешудем. Ӯ маро  зиёд дӯст медошт ва ҳеҷ гоҳ ғамгин шудан намегузошт. Пеши худ мақсад гузоштам, ки хондагӣ набошад ҳам, ба Маҳмуд ба шавҳар мебароям ва агар падару модарам зид бароянд, ҳамроҳи ошиқам аз деҳа фирор мекунем…

Бахти нимкола

 Хушбахтона, падарам “ҳамқавму ҳамдеҳа”  гуфта, хостгории Маҳмудро хуш пазируфт ва барои хушбахт шудани мо фотиҳа дод. Он рӯз ман худро хушбахттарин духтари дунё меҳисобидам, аммо…

Ҳамон сол ман Донишгоҳи омӯзгориро хатм намудам ва баробари диплом гирифтанам тӯйи ману Маҳмуд барпо гашт. Бо либоси сафеди арӯсӣ ва қалби моломоли орзуҳои ширин ба хонаи бахтам қадам ниҳодам, вале чашидани шаҳди висол ба ман муяссар нагашт. Маҳмуди ошиқи шайдо на шаби аввал ва на шабҳои дигар майли ба ман наздик шудан накард…

Марди зангурез

Бо гумони он ки шояд шавҳарам бемор аст, то баромадани чиллаи арӯсиам лаб зери дандон гирифта дар ин бора даҳон намекушодам. Ҳамин тавр аз тӯямон чанд моҳ гузашт, вале Маҳмуд ҳамоно дилу нияти ба ман наздик шудан надошт ва бо ҳар баҳона аз ҷогаҳ мегурехт. Шавҳарам бар замми дар бистар сард буданаш дар ягон ҷо кор намекард ва рӯзи дароз пояшро болои по монда хоб мерафт. Ман гӯё шавҳар нею зан гирифта бошам, дар мактаби деҳа муаллима шуда кор мекардам ва аробаи зиндагиро ба танҳоӣ мекашидам. Ҳастиамро пурра ба кор бахшида, кӯшиш мекардам, ки дар бораи зиндагии нобасомон ва бе рангам фикр накунам, вале саволҳои пай дар пайи хешу табор дар бораи он ки чаро фарзанддор нашуда истодаем, захми диламро хуншор мекарданд…


Бечора бача хушгӯӣ карданӣ шуда, гап мепартофт, вале дар ҷавоб хун ба сарам зада, сангу кулӯх ва ҳар чизи дигари аз пешам баромадаро ба сӯяш ҳаво дода, Элмуродро дашномҳои қабеҳ медодам.

 


Гирдоби зиндагӣ

Шавҳарам баъди як сол гӯё бо нияти коркунӣ ба Русия рафт, вале бо ҳамин беному нишон шуд. Вай на як тин пул мефиристод ва на занг зада ҳолу аҳволи маро мепурсид. Модарам мегуфтанд, ки шояд ба шавҳарат ҷин ёр шуда бошад, чунки яку-якбора аз зан ва зиндагӣ дилсард гаштани мард номумкин аст. Ман метавонистам ҳамон вақт аз баҳри чунин ҳаёти бемаънӣ гузашта баромада равам, вале азбаски Маҳмудро аз сидқи дил дӯст медоштам, ба ҳамааш тоқат карда, бозгашти шавҳарамро интизор шудам…

Бегонадил

Шавҳарам баъди якуним сол баргашт, вале ҳамоно мисли пештара шавҳардори бешавҳар будам. Гоҳо тоқатам тоқ мешуд ва сабаби аз ман дурӣ ҷустанашро пурсон мешудам. Маҳмуд баҳона пеш меовард, ки асабаш хароб аст ва то ба худ наояд, бо ман дар як ҷойгаҳ хоб карданӣ нест. Чанд бор гуфтам, ки ба назди духтур рафта табобат бигирад, аммо бо шунидани ин суханон шавҳарам ба ғазаб омада дод мезад, ки ягон мушкили мардона надорад, кадом вақте ки дилаш хост, ҳамон вақт ба ман наздик мешавад…

Ғуломи ҳалқабаргӯш

Бо ҳамин аҳвол чӣ хел аз зиндагиамон чор сол гузашт, нафаҳмидам. Маҳмуд то ҳол дар ягон ҷо кор намекунад ва мудом аз ҳисоби ману бародараш хӯрда мегардад. Дар хонаи шавҳарам шавҳардори бе шавҳар ҳастам. Ба назарам чунин мерасид, ки Маҳмуд зан не, маро ба худ хизматгор гирифтааст. Хизмати падару модарашро мекунам, либосашро мешӯям, хӯрок мепазам, моҳонаамро оварда бо ду дасти адаб ба дасташ медиҳам, то ки шавҳарам ҳамроҳи ҷӯраҳояш кайфу сафо карда гардад, вале бар ивази ин ҳама қурбониҳо ҳатто як зарра меҳрубонӣ намебинам. Мудом аз ман пул талаб кардани шавҳарам ҷонамро ба лабам расонидааст. Пул надорам ё намедиҳам гӯям, шавҳари хонашери майдонғарибам ба сарам зӯрӣ карда, маро зери мушту лагад мегирад…

На зан мекунад, на талоқ медиҳад

Борҳо гуфтам, ки агар ман ба ту маъқул набошам, талоқамро деҳ, бе ягон даъвою гапу хабари зиёдатӣ баромада меравам, вале шавҳарам пушти сарашро хорида мегӯяд, ки ман зани сар медодагӣ надорам. Ростӣ, ман ин мардакро ҳеҷ нафаҳмидам, дӯст медорам мегӯяд, вале шабҳо рӯяшро тарафи девор гардонда хоб меравад. Сарҳисоби корамро гум кардаам, охир то ба кай ман дар хонаи хушдоманам мисли шавҳардори бе шавҳар зиндагӣ мекунам? Мо дар як ҳавлӣ чор келин ҳастем. Ҳамин тавр 4-5 соли дигар бо маймунбозӣ гузарад, боварӣ дорам, ки падару модари Маҳмуд бо туҳмат  “ин келин бача намезояд” гуфта, маро аз дар берун мекунанд. Фикр мекунам, ки шавҳарам танҳо ба хотири зани коргару пулёб буданам маро аз даст додан намехоҳад. Ба кадом мард намефорад, ки аз ҳисоби занаш маишат карда гардад?!

Шавҳар ё дугона?

Хонандагони азиз, шояд шумо маро маломат карда лаънат хонед, ки сирри шавҳарамро фош намудам, вале охир ман ҳам инсон ҳастам ва орзую ормонҳои худро дорам. Дилам мехоҳад, ки мисли дигар занҳо шавҳарам ба ман меҳрубонӣ кунад, мехоҳам фарзанд дошта бошам ва бо меҳр аз дасти кӯдаконам гирифта ба боғчаю мактаб барам, аммо…

Чанд маротиба сари ин мавзӯъ бо шавҳарам суҳбат карда, ошкоро гуфтам, ки агар бемор бошад, рафта табобат бигирад, вале дилаш маро нахоҳад, ҷавобамро дода, зани дигар гирад, чунки зиндагӣ бе фарзанд маънӣ надорад. Маҳмуд дар ҷавоб “ман мардам, аз худам сад фоиз боварӣ дорам”  мегӯяд, вале ростӣ, дар чор сол ягон бор мард буданашро ҳис накардам. Ба ман бисёр мушкил аст, охир то ба кай мисли ду дугона чақ-чақ карда мегардем?

Қурбоққа шӯ дорад, обрӯ дорад

Тамоми хешу табор ба ҷону ҳолам намонда, ҳар рӯз мепурсиданд, ки чаро аз тӯямон чор сол гузашту то ҳол бачадор намешавем. Хушдоманам маро гунаҳкор карда, чанд маротиба зӯран ба назди духтур бурданӣ шуд. Оқибат ҷонам ба лабам расид ва пас аз чор соли хомӯшӣ сирри шавҳарамро фош карда, гуфтам, ки писараш то ҳол ба ман наздикӣ накардааст, аз куҷо ҳомиладор шавам? Гумон доштам, ки хушдоманам то ҳол бокира будани маро фаҳмида, ин гапро ба шавҳараш мегӯяд ва падараш бо Маҳмуд ҷиддӣ суҳбат мекунад, лекин хаёлам хом баромад. Падару модари шавҳарам заррае парвои ояндаи моро надоранд, гӯё маро келин не, ба худу писарашон хизматгор гирифта бошанд. Бепарвоии хусуру хушдоманамро дида, ба модарам гуфтам, ки аҳволи шавҳарам ҳамин аст, маро ба хона баред, вале дар ҷавоб “қурбоққа шӯ дорад, обрӯ дорад” гӯён, маслиҳат дод, ки тоқат кунам, Худо хоҳад, рӯзе ҳамааш хуб мешавад…

Дар байни обу оташ

 Бо баҳонаи меҳмонӣ ба хонаи падару модарам омадам, вале нияти дубора ба хонаи хушдоманам баргаштан надорам. Ба аҳли оилаамон гуфтам, ки агар рафта чизу чораи маро аз хонаи хушдоманам наоранд, худамро ба дарёи Зарафшон партофта несту нобуд мекунам, зеро зиндагии бе рангу бе маънӣ ба дилам задааст. Дили бародаронам ба ҳоли ман сӯхта, розӣ шуданд, ки аз шавҳарам ҷудо шавам, вале модарам ҳамоно “хонаи гунҷишкро вайрон кардан убол аст, инҳо бошанд инсон ҳастанд, сабр кунед, шояд ҳамааш хуб мешавад” гӯён, монеъ шуда истодааст.

Ман дигар дилу нияти ба он ҷаҳанам баргаштанро надорам, аммо падарам мегӯяд, ки агар ман баромада равам, сирри Маҳмуд фош мешавад ва шавҳарам тобу тоқати бардоштани шармандагиро накарда, даст ба худкушӣ мезанад. Байни обу оташ монда, чӣ кор карданамро намедонам. Хонандагони азиз, илтимос, ба ман маслиҳат диҳед, чӣ гуна аз ин гирдоби номуродӣ бароям?

Шаҳло, аз шаҳри Панҷакент
РС: Сабти аудиоии сарнавишти ин зани дар чороҳаи тақдир ҳайронмонда дар идораи сомонаи ОИЛА-ТЧ мавҷуд аст!

 

Хабарҳо дар шабакаҳои иҷтимоӣ:
Шарҳ
(17)
Jamila Saydamirova 2019-09-04, 16:51
зани беакл
Посух
Панчакенти Jamila Saydamirova 2019-09-04, 21:15
Чаро зани беакл мегуи худат бааклаки . Ку аз бааклият гап зан. У маслихат пурсидааст на танкири касу нокас. Мазан ба даре ки мезанад ба дарад jamilajon.😂
Посух
Гулгун 2019-09-04, 16:52
чи магар хизматгори хони шавхар шуда умрашро хазон градонад?!
Посух
Фируза Ашурова 2019-09-04, 17:32
Одам ба шавхар мебароят ки фарзандор шавад партоед раваед умратонро бехуда хазон накунед шумо магар хизматгор хастет сол рафта истодааст тезтар чудо шавед ягон марди хубро интихоб кунеду фарзандор шаваед
Посух
Ромиш 2019-09-04, 17:43
Вайро табобат кардан лозим вай чин дорад.Шавхаратона табобат кунед нагз мешавад,ва гарна бо хамихел 4соли дигар мегузарад бе фойда
Посух
Фируз 2019-09-04, 17:44
Занонро набояд, тоҷу тахт,гуломи занги бошаду, к.... сахт!!! Гуфтаанд бузургон!!
Посух
Фируз,, 2019-09-04, 17:55
Занонро набояд,точу тахт,,,Гуломи занги бошаду,к....сахт.
Посух
Абдурраҳмон 2019-09-04, 18:32
Хоҳари азиз шумо метавонед ба назди домуллои шаҳри Панҷакент рафта ҳодисаи корро гуед ва ҳақ доред талаби талоқ кунед ва домулло ба шумо қоғази талоқ медиҳад ва шумо метавонед шавҳар кунед.
Посух
Домулои панчакенти Абдурраҳмон 2019-09-05, 16:47
Домуло гайри куфу суф ягон кор карда наметона. Когазу калам кори домуло нест. На мухр дорад домуло на коркуни ягон идорахои давлати аст.
Посух
Сомонӣ 2019-09-04, 18:46
Беақл гӯён сарзаниш кардан осон аст,вале ҳар як шахс ба ҷои ин апа худашро монда тассавур кунад, як руз ҳам тоқат накарда меравад
Посух
Одам 2019-09-04, 20:09
Ту ин корро барвактар мекарди хуб мешуд 4 соли умратро хазон карди.......
Посух
Саме Самеев 2019-09-04, 23:43
Шуд дигар у хона наравед у зиндаги нест худо бахтатона теад
Посух
ТОХИР 2019-09-05, 05:49
Не ин зан бе акл нест. Як бор ахволи худата дар чои хамин зан тасавур кун.
Посух
Мавзуна 2019-09-05, 08:45
Хар як шахс барои худ низ бляд зист. Камтар хонаи падар бошед танбезашро бинад.
Посух
Точик 2019-09-05, 10:04
Дар ин вокеа хукуки зан хам аз руи дини ислом ва хам аз руи конун сад дар сад поймол гаштааст. Махз аз хамин гуна ходисахо аксарияти занон даст бад худкуши мезанан. Мо бояд фаромуш накунем, ки Зан дар ин дуне ба мардон хамчун Амонат аст ва Амонатро набояд хиенат кард....
Посух
Ризвон 2019-09-05, 10:08
Зик нашав сестра рузхои нави зиндаги ба пеш.дигар ба ин хонаи шавхар бар наград падар ва Модаратхам дер ё зуд хатогии худро мефахманд ва туро мебахшанд.иншооллох всё будет хорошо!!!!!!!!!!
Посух
Сурайё 💞 2019-09-06, 22:03
Хар як духтар бо умед шавхар мекунад,ки сохиби фарзанду оилаи солим бошад. На ин ки хизматгору оранди хона. Ун шавхаре,ки аз ухдаи ягон кор намебарояд, на аз хурондану пушондан, на аз ухдаи мехрубони ба у зиндаги чи даркор. Мон танхо шинад. Шавхар кун фарзандор шав. Умратро бехуда нагузарон.
Посух
Шарҳ
Тавсия медиҳем:
Ду нигоҳ
22 . 06 . 2019
Редактор
Панҷ панҷаи занам ҳунар аст
Мард ҳамчун сардори оила бояд нисбати ҳамсар ва аҳли оилааш ғамхору дилсӯз бошад. Серкориро баҳона накарда, дар тарбияи фарзандонаш ҳисса...
200
0
Ҳаводис
Панҷакент: Меҳронаи 16-сола ғарқ шуд
Модари Меҳмона дар Русия дар муҳоҷирати меҳнатӣ қарор дошта, баъди шунидани хабари марги фоҷиавии ҷигарбандаш бо чашмони гирёну дили хунчакон...
2258
1
Саидҷон Нодирӣ
Пиёз гайморитро даво мебахшад?
Пас аз ҳалоим шуданаш пиёзро гармогарм (ба дараҷае, ки баданро насӯзонад) ба матои ғафстар печонда, ба ҷои дардманд мебандед.
204
0
маводҳои монанд
Ҳаводис
Панҷакент: Хушдомани келинкуш заҳр хӯрд
Сайёра дар пурсиши нахустин ба гуноҳаш иқрор шуда ба кормандони мақомоти ҳифзи ҳуқуқ гуфтааст, ки ману модарам ҳамеша келинро мезадем,...
10716
25
Ҳаводис
Панҷакент: Арӯс як рӯз пеш аз тӯй худро ба дарё партофт
Меҳмонон аллакай ба маҳфили арӯсии Ситора даъват шуда буданд, аммо ба ҷойи либоси сафеди арӯсӣ ба ин нозанин кафан пӯшонда,...
11538
31
Ҳаводис
Артучи Панҷакент: Мурдаро аз гӯр бароварданд!
Барои аниқ кардани сабаби марги Наргис Юнусова ҷасади арӯсакро дубора аз гӯр бароварда, эксгуматсия карданд” мегӯяд яке аз ҳамдеҳагони ин...
5654
7