Дирӯз дар деҳаи Марғедари шаҳри Панҷакент боз як ҳодисаи нохуш рӯй дода, боиси марги як духтари нозанин гашт, ки мебоист имрӯз маҳфили арӯсиаш баргузор гардад.

Дар ин бора ду нафар сокинони шаҳри Панҷакент бо шарти ифшо накардани ному насабашон ба хабарнигорони сомонаи ОИЛА-ТЧ хабар доданд.
Тавре ки шоҳидони ҳол мегӯянд, духтараки даст ба худкушӣ зада Ситораи Туғён ном дошта, муҳасили курси чоруми Донишгоҳ арӯсаки дар фотиҳа будааст. Мебоист пагоҳ, яъне рӯзи шанбе, 20-уми июл ҷашни арӯсии Ситора баргузор гардад, аммо ду рӯз пеш аз тӯй ин арӯсаки нозанин даст ба худкушӣ зада, худро ба дарё партофтааст.

Аз рӯйи овозаҳо гӯё волидонаш бидуни розигии духтар ӯро ба шавҳар додаанд. 
Ситора бо баҳонаи гирифтани фатта ва куртаи сафеди арӯсӣ аз хона баромада, бо ҳамин дигар бар намегардад. 
Овозаи дигар низ вуҷуд дорад, ки Ситора ва домодшаванда ҳамдигарро дӯст медоштанду касе маҷбуран арӯсакро ба дарё партофтааст, аммо ҳақиқати ин ҳодиса то ҳол маълум нест. 

Меҳмонон аллакай ба маҳфили арӯсии Ситора даъват шуда буданд, аммо ба ҷойи либоси сафеди арӯсӣ ба ин нозанин кафан пӯшонда, бо нолаҳои зор ҷисми беҷонашро имрӯз, соати 16-дар оромгоҳи зодгоҳаш ба хок супурданд.