Салом, хонандагони азиз! Ман Нигора, корманди соҳаи тиб ҳастам. Ҳамеша ба кори худ дилбастагӣ доштам ва барои соҳиб шудан ба ихтисосам ҳафт соли умрамро ба таҳсил бахшидам. Ҳоло соҳиби оила ва фарзанд ҳастам, аммо намедонам чӣ тавр ҳам кори дӯстдоштаамро нигоҳ дораму ҳам аз мушкилоти хонаводаи шавҳарам халос шавам.

Дар оилаи шавҳарам касе маълумоти олӣ надорад. Шояд ҳамин сабаб бошад, ки онҳо маро намефаҳманд. Аз шавҳарам сар карда, то хусуру хушдоманам ҳамеша ба кори ман эрод мегиранд. Мегӯянд, ки зан бояд дар хона нишинад, фарзандонашро тарбия кунад ва корро тарк намояд.

Ман зидди тарбияи фарзандонам нестам. Баръакс, онҳоро хеле дӯст медорам. Аммо намехоҳам ҳафт соли таҳсил ва меҳнати чандинсолаамро ба осонӣ канор гузорам.

Мушкил танҳо бо ин тамом намешавад. Хусуру хушдоманам барои тарбияи фарзандонам низ маро зиёд сарзаниш мекунанд. Аз ин муносибат асабҳоям хароб шудааст.

Аммо чанд рӯз пеш сухане аз даҳони падаршӯям баромад, ки тамоми вуҷудамро ба ларза овард. Ӯ дар ҳолати асабонӣ ба ман гуфт, ки метавонад ягон шаб маро кушад ва баъд писарашро ба зани дигар диҳад.

Аз ҳамон рӯз дигар шабҳо ором хоб карда наметавонам. Ҳар садое маро метарсонад. Аммо аз гуфтани ин сухан ба шавҳарам низ метарсам. Ӯ бисёр бадрашк аст ва намедонам, ки агар ин масъаларо ба ӯ гӯям, чӣ вокуниш нишон медиҳад.

Аз шумо маслиҳат мехоҳам: чӣ кор кунам? Оё ин таҳдидро нодида гирам ё ба касе хабар диҳам?

НИГОРА