НОМИ ДУХТАРОНА
Номҳо бо ҳарфи "И"
662
3

И –

ИБОДАТ а. عبادت парастиши Худо; иҷрои вазифаҳои фарзшудаи (ҳатмии) динӣ («ФЗТ»); бандагӣ кардан ва парастидани Худо («Муъин»); бандагӣ, ниёиш кардан («Вожаҳои сара»); тоат ва ниҳояти таъзим барои Худои мутаол («Ақраб-ул-маворид», «Деҳхудо»).

       Бурдам ба Каъба узри гуноҳи худ аз дарат,

       Кардам ибодатею гунаҳкортар шудам. (Мушфиқӣ)

 

       Ибодат ба ҷуз хидмати халқ нест,

       Ба тасбеҳу саҷҷодаву далқ нест. (Саъдии Шерозӣ)

ИЗЗАТ а. عزت бузургӣ, арҷмандӣ; азиз будан, соҳиби эҳтиром будан («ФЗТ»); арҷманд шудан, гиромӣ гаштан, сарафрозӣ («ФНЭ»); арзиш доштан, арҷ, обрӯ, сазоворӣ («Вожаҳои сара»); сарбаланд шудан («Муъин»); азизӣ («Фарҳехта»); азамату бузургворӣ («Нозим», «Деҳхудо»).

       Офтоби тобонам, иззатам зи хориҳост,

       Ҷо дар осмон дорам, рӯй бар замин дорам.

(Мулҳами Бухороӣ)

ИҚЛИМО اقلیما резаи зар («ФНЭ»);

2. номи духтари Ҳазрати Одам (а) («ФНЭ»).

ИНОБАТ а. انابت тавба кардан, бозгаштан аз чизе, даст кашидан аз гуноҳ; тавба, зорӣ, пушаймонӣ («ФЗТ»); тавба кардан ва дуо хостан («Кашф»); ва дар «Мунтахаб»-у «Суроҳ» бозгардидан ба сӯи Худо ва боз гаштан аз корҳои бад («Fиёс», «Фарҳехта»); баргаштан аз гуноҳ («Муъин»).

ИНОЯТ а عنایت дастгирӣ, ёрӣ; лутфу марҳамат, меҳрубонӣ, илтифот, таваҷҷӯҳ («ФЗТ»); таваҷҷӯҳ намудан, мавриди таваҷҷӯҳқарор додан; эҳсон кардан, инъом кардан («Фарҳехта»); диққат кардан («Муъин», «ФНЭ»).

       Саҳл гардад бо иноятҳои ӯ ҳам дар замон,

       Ҳар чӣ аз меҳнат ба рӯи мард айём оварад.

(Амир Муиззӣ)

       Бе иноят ба суи дӯст қадам то наниҳӣ,

       Ки ба ҷое нарасӣ ҷуз ба чунин роҳбаре. (Камол)

ИРОДА//ИРОДАТ а. ارادت||اراده 1. майлу хоҳиш, ихтиёр («ФЗТ»); хост («Муъин»); хостан, қасд, оҳанг («Фарҳехта»);

2. ихлос, сидқ, дилбастагӣ, дӯстӣ, дӯстии бериё, эътиқод («ФЗТ»).

Хабарҳо дар шабакаҳои иҷтимоӣ:
Шарҳ
(3)
ирода 2019-09-12, 12:24
чи
Посух
Джамшед 2019-10-07, 08:59
Потчох
Посух
валичон 2019-10-15, 19:09
ШАРҲАТОНРО ГУЗОРЕД
Посух
Шарҳ