Дар доираи Созишномаи ҳамкорӣ байни Вазорати меҳнат, муҳоҷират ва шуғли аҳолии Ҷумҳурии Тоҷикистон ва Вазорати шуғл ва меҳнати Ҷумҳурии Корея шуруъ аз семоҳаи аввали соли 2025 муҳоҷирони меҳнатии тоҷик барои кор ба Ҷумҳурии Кореяи Ҷанубӣ фиристода мешаванд. Дар ин бора Вазорати меҳнат, муҳоҷират ва шуғли аҳолии Ҷумҳурии Тоҷикистон хабар додааст.

Шахсоне, ки хоҳиши ба Кореяи Ҷанубӣ ба муҳоҷирати меҳнатӣ рафтанро доранд, метавонанд ба Муассисаи давлатии “Агентии бокортаъмикунӣ дар хориҷа”-и Вазорати меҳнат, муҳоҷират ва шуғли аҳолии Ҷумҳурии Тоҷикистон муроҷиат намоянд. Тибқи дархости корфармоёни Ҷумҳурии Корея дар гурӯҳи аввал кафшергар (сварщик)-ҳо ба Кореяи Ҷанубӣ фиристода мешаванд.

Шартҳои муҳоҷирати меҳнатӣ ба Кореяи Ҷанубӣ:

- Ба қайд гирифтани корҷӯй дар Муассисаи давлатии “Агентии бокортаъмикунӣ дар хориҷа”-и Вазорати меҳнат, муҳоҷират ва шуғли аҳолии Ҷумҳурии Тоҷикистон;

- Синну соли мувофиқ, яъне аз 18 то 39-сола, тибқи созишнома;

- Донистани забони кореягӣ дар сатҳи гуфтугӯӣ ҳатмӣ мебошад;

- Доштани шаҳодатномаи тахассусӣ бо ихтисоси кафшергар.

Шаҳрвандон метавонанд дар марказҳои зерин забони кореягӣ ва дигар касбу ихтисосҳои лозимиро дар маркази таълими калонсолони Тоҷикистон воқеъ дар шаҳри Душанбе (+992 909 22 21 22 ва +992 988 50 78 70), Маркази касбомӯзӣ ва хизматрасонӣ воқеъ дар шаҳри Бохтари вилоти Хатлон (+992 907 99 84 89 ва +992 933 28 83 83), Маркази касбомӯзӣ ва хизматрасонӣ воқеъ дар шаҳри Хуҷанди вилояти Суғд (назди Тролебусний парк), (+992 92 807 9999) омӯзанд.

Интихоб ва омодасозии ҳуҷҷатҳо барои сафарбаркунӣ аз ҷониби шахсони масъул (намояндаи Ҷумҳурии Корея) анҷом дода мешавад.

Эзоҳ: Илова бар ин, шаҳрвандон метавонанд дар дилхоҳ марказҳои забономӯзии ба онҳо мувофиқ забони кореягиро омӯзанд.

Барои дастрас намудани маълумоти иловагӣ ба суроғаи шаҳри Душанбе, кучаи Лоҳутӣ, бинои 108 муроҷиат намоед.

Телефонҳо барои маълумот: 250-32-42 (Вазорат), 221-39-67, +992 55 555 1080, +992 987 906 666, +992 915 767 743, +992 930 934 994, +992 934 53 51 93 ва +992 906 88 93 13