ххххх
Дагар ба фикр фурӯ рафта, китоб мехонд, ки Маҳина бо дидаи ашкбор наздаш омада пурсид:
-Дагар, беҳуда бо ман оиладор шудед, ҳамин тавр не?! Акнуназ ман ҷудо мешавед?
- Чаро ин тавр мегӯӣ?
- Модарҷонам “ҳеҷ корро наметавонад” гуфта аз ман сахт ранҷиданд-ку! Ҳар гоҳ ки ба хонаамон равам, модари худам ҳам маро сарзаниш мекунанд, вале ҳарчанд кӯшиш мекунам, ҳеҷ дасту дилам ба ягон кор пеш намеравад. Ким-чи хел аз зиндагӣ дилсард ҳастам, хаёлам, ки ҳаётам маънӣ надорад. Ягона чизе, ки ба он дилбастагӣ дорам, шумо ҳастед, илтимос бо ман ҷудо нашавед!
-Ақлу ҳушат дар куҷост. Духтар! Магар ман барои дилхушию бозӣ бо ту оиладор шудам, ки ҷудо мешудаам!
-Пас барои чӣ оиладор шудед?
- Барои он ки ман туро дӯст медорам. Дигар дар бораи ҷудо шудан чизе нагӯй майлаш?
-Охир мани ноуҳдабаро ақаллан як духтар ё писар таваллуд карда натавонистам, ки забонамон камтар дароз шавад...
-гуфтам, ки Фарзандро худо медиҳад. Ин қадар дар ин бора гап зада, ҳам асаби ман ва ҳам асабҳои худатро вайрон накун,-Дагар инро гуфту китобҳои рӯйи миз монда, баромада рафт...
хххххх
-Санавбар, шумо ин қадар духтари чаққону кордон. Аз панҷ панҷаатон ҳунар мерезад. Ҳайронам, ки чаро ман ҳар қадар кӯшиш кунам ҳам, мисли шумо шуда наметавонам. Ба шумо ҳавасам меояд,- ба меҳр ба всунаш нигариста софдилона гуфт Маҳина, ки ба хонаи хушдоманаш меҳмонӣ омада буд.
-Дар хонаатон як духтаред, дар вақташ волидонатон шуморо расо эрка кардагистанд-дия!
-Бале, дар ҳақиқат эркаи хона будам. Падарам намегузоштанд, ки дастамро ба оби хунук занам. Рӯзи тӯй маро оғӯш карда чунон гиря карданд, ки ҳама меҳмонҳо гирён шуданд,-бо табассум ба ёд овард Маҳина.
-Падару модаратон агар ҳамон вақт шуморо ин қадар эркаю азиз накарда кору бори хонаро ёд медоданд ва каме сахтгирӣ мекарданд, шояд имрӯз дар хонаи шавҳар ин қадар шарманда намешудед,- заҳрханда кард Санавбар.
- Шумо ба ман ёд диҳед. Ба хонаи мо равед. Апаву хоҳар шуда кор мекунем. Ман аз шумо меомӯзам.
- Кору бори худам аз мӯйи сарам ҳам зиёд, ғайр аз ин, ман модар ё апаатон нстам, ки ба шумо рӯзгордориро ёд диҳам,-сахт карда гуфт Санавбар.
Суханони ӯ чунин маънӣ доштанд, ки ману ту ҳеҷ гоҳ дӯст ва апаю хоҳар намешавем, аз ман ягон некиро интизор нашав...
(Давом дорад)
