Пайдоиши сабӯсак дар сари мард сабабҳои гуногун дорад, аз фишори руҳӣ сар карда, то нодуруст интихоб намудани шампуни саршӯӣ.
Дар ҳолати нодуруст кор кардани рӯдаҳо ва ҷигар мӯйи сар ҳамчунин равғанин мешавад ва сабӯсак пайдо мекунад. Омили дигари пайдо шудани сабӯсаки сар ин риоя накардани тозагии шахсӣ ва пайдо шудани бактерияҳои ангезандаи сабӯсак мебошад.
Сабӯсак се намуд мешавад: хушк, равғанин ва омехта. Дар сурати хушк будани сабӯсак пӯсти сар сурх гашта, ба хориш меояд, мӯйҳо беҷон шуда мерезанд. Ҳангоми равғанин будани сабӯсак пӯсти сар равғанин ва мӯйҳо зуд ифлосу часпак мешаванд. Ранги сабӯсаки равғанин зардчатоб буда, дар сар қабат ба қабат мехобад. Сабӯсаки омехта нишонаҳои ҳам сабӯсаки хушк ва ҳам равғанинро дорад.
Асабӣ нашавед
Ғизои нодуруст, истеъмоли аз ҳад зиёди шириниҳо ва хӯрокҳои равғанину бирён боиси халалёбии мубодилаи моддаҳо дар ҷисми мард гашта, дар натиҷа дар сар сабӯсак пайдо мешавад. Асабонияти сахт ва фишори руҳӣ метавонад сари мардро пур аз сабӯсак гардонад. Мардҳо наметавонанд ба касе дарди дил карда, мушкилоти худро бе парда бигӯянд ва дилашонро бо оби дида рехтан холӣ кунанд. Дар натиҷа, хастагии равонӣ дар ҷисм ҷамъ шуда, боиси ба касалиҳои гуногун гирифтор гаштан ва пайдо шудани сабӯсак мегардад.
Истироҳат кунед
Пас аз ягон ҳодисаи нохуш ва ё фишорҳои пай дар пайи руҳӣ дар сари шумо сабӯсак пайдо шуда бошад, беҳуда пул сарф карда, шампуни зидди сабӯсак нахаред, чунки то асабатонро ором насозед, аз сабӯсак халос шуда наметавонед. Ба дорухона рафта, доруҳои таскинбахши асаб ва витаминҳо харед. Бештар дар ҳавои тоза сайругашт карда, нағз дам гиред. Асабҳоятон, ки ором шуданд, танҳо он вақт шампуни зидди сабӯсак ва ё дигар илоҷҳо сабӯсакро нест карда метавонанд.
Бо оби ҷӯш сар нашӯед
Вақте кори ҳормонҳо дар ҷисми мард халалдор мегардад, пӯсти рӯй ва мӯйи сар равғанин мешавад ва дар натиҷа сабӯсаки сару дигар бемориҳо сар мезананд. Аксаран, сабӯсак дар мардҳое дида мешавад, ки бо оби аз ҳад зиёд гарм ва ҳатто ҷӯш сар мешӯянд. Дар сурати бо оби беҳад гарму ҷӯшон шустани сару мӯй пӯст хушк шуда, организми инсон истеҳсоли чарбуро бештар мекунад, то пӯст хушк ва осебдор нагардад. Аз ҳамин сабаб, ба мардон зуд-зуд ва бо оби ниҳоят ҷӯшону гарм шустани сар тавсия дода намешавад. Дар ҳавои сард сари луч нагашта, кӯшиш кунед, ки пӯсти саратонро аз гармохунукшавӣ эмин нигоҳ доред.
Ба ҳолати кори меъдаву рӯда аҳмият диҳед
Ҳангоми асабонияти аз ҳад зиёд, истеъмоли нодурусти ғизо ва ба тозагӣ риоя накардан низ боиси пайдо шудани сабӯсаки сар шуда, пӯсти сар ва мӯй метавонад ҳатто бӯйнок гардад, ки сабабаш пайдо шудани микроорганизмҳои хурд, ба мисоли бактерияҳо мебошанд. Дар чунин ҳолат аз шампунҳои махсус истифода бурда, реҷа ва намуди хӯрокхӯриатонро иваз кунед. Ҳатман аз муоинаи гастроэнтеролог гузаред, зеро пайдоиши сабӯсак оддӣ тобад ҳам, бештари вақт нишона аз кори нодурусти системаи ҳозима буда метавонад.
Оби пиёз молед
Як дона пиёзро аз турбтарош гузаронида, обашро ба саратон молед ва 2 соат сабр кунед, сипас, ба саратон равғани эфири лимӯ, ё лаванда молед. Мӯйи саратонро баъди ин бо оби сиркодошта бе собун шӯед, то бӯйи пиёз рафъ гардад.
Сирко ва лимӯ
Аз сабӯсак халос шудан хоҳед, дар 2 литр об 2 қошуқча сирко, ё шарбати лимӯ андохта, баъди саршӯӣ мӯйи саратонро бо ин об обгардон кунед.
Равғани беданҷир ва тухм
Ба касоне, ки аз сабӯсаки сар азият мекашанд, маслиҳат медиҳем, ки ҳафтае 3 маротиба ба пӯсти сарашон равғани беданҷир (касторовое масло) моланд. Пас аз 20-30 дақиқа сарро нағзакак шустан лозим аст.
Як дона тухмро бо оби гарм омезиш дода, маҳлули тайёршударо ба мӯйи саратон молед. Пас аз 15 дақиқа сарро шустан лозим аст.
