Дар ноҳияи Синои шаҳри Душанбе як зан ҳангоми фурӯши чилимҳои электронӣ ба ноболиғон аз ҷониби кормандони милитсия боздошт гардид.
Ба иттилои мақомоти милитсия, Имомалиева Моҳира, сокини 39-солаи пойтахт, зимни ба фурӯш гузоштани чилимҳои электронӣ ба ноболиғон аз ҷониби кормандони самти кор бо ноболиғон ва ҷавонони ШВКД-1 дар ноҳияи Сино дастгир карда шудааст.
Зимни санҷиш аз номбурда 47 адад чилими электронӣ дарёфт ва мусодира гардидааст.
Дар робита ба ин ҳолат нисбати Имомалиева М. тибқи моддаи 463 иловаи 2 Кодекси ҳуқуқвайронкунии маъмурии Ҷумҳурии Тоҷикистон протоколи маъмурӣ тартиб дода шуда, нисбат ба ӯ ҷазои маъмурӣ дар шакли ҷарима татбиқ шудааст.
Мақомоти милитсия аз волидон даъват менамоянд, ки назорати фарзандони худро тақвият бахшида, барои пешгирии истеъмол ва истифодаи маводи зараровар аз ҷониби ноболиғон чораҳои зарурӣ андешанд.