Як муҳоҷири меҳнатӣ дар вилояти Свердловски Русия се кӯдакро аз сӯхтор наҷот додааст.

Дар ин бора, расонаҳои маҳаллии Русия хабар дода, аз ин нафар Саид Шарипови 32-сола ном бурдаанд, ки 16 сол боз дар Русия ҳамчун ронандаи таксӣ фаъолият мекардааст. Аммо гуфта нашудааст, ки мавсуф шаҳрванди кадом кишвар аст.

Тавре зикр мегардад, сӯхтор шоми 14-уми май дар ошёнаи аввали бинои панҷошёнае дар шаҳраки Березовский рух додааст. Ба гуфтаи Саид, ӯ ҳангоми бозгашт аз дорухона садои гиря ва кумакталабии кӯдаконро мешунавад. Аз тиреза вориди хона мешавад ва ҳарсе кӯдакро, ки дар он лаҳза танҳо будаанд, аз коми оташ берун мебарорад.

Сокинони маҳаллӣ ӯро барои ин амалаш қаҳрамон ном мебаранд. Аммо худи ӯ гуфтааст: «Ман танҳо вазифаи инсониямро анҷом додам. Худам ҳам фарзанд дорам».