Чанд сол пеш дар таърихи Консерваторияи давлатии ба номи Ҷузепе Вердеи шаҳри Милани Италия аз кишварҳои Осиёи Марказӣ якумин шуда, ҷавони тоҷик Шоҳрух Юнусов донишҷӯ гардид. Ин орзуи даврони кӯдакии ӯ буд, ки бо розигиву саҳми волидайн ва дастгириҳои роҳбарияти ҳукумати кишвар амалӣ шуд. Ӯ зинаи бакалаврияти Консерваторияро бо баҳои аъло хатм карда, ба ҳайси магистр таҳсилашро идома дод.
Шавқу завқ ва алоқамандӣ ба санъати мусиқии классикӣ ҳанӯз аз шашсолагӣ Шоҳрухро ба саҳнаи ҳунар овард. Опера дунёи орзуҳои ӯ буд ва ҳамеша талош менамуд, ки хостаҳои қалбашро амалӣ намояд. Шоҳрух ҳанӯз замони таҳсил дар мактаби миёна саҳнаҳои калонро тасхир карда, иштирокчӣ ва ғолиби озмунҳои байналмилалӣ дар Италия ва дигар кишварҳои аврупоӣ гашта буд.
Шоҳрух Юнусов айни ҳол бо 15 забони хориҷӣ опера месарояд. Дар баробари забони модарӣ ба 5 забони дигар озодона суҳбат карда метавонад. Садои гушнавоз, маҳорати баланди операсароӣ ва забондонӣ ба ӯ имкон додааст, ки Тоҷикистонро дар Аврупо ва ҷаҳон арзанда муаррифӣ намояд.
Шоҳрух ба Тоҷикистон омад. Бо ташаббуси ин ҷавони ташнаи санъат соли 2021 устодаш Делфо Минекучи ба кишвари мо омад ва давоми як моҳ ба салистони Театри давлатии опера ва балети ба номи Садриддин Айнӣ дарси маҳорат гузаштанд. Минекучи аз Тоҷикистон ва мардуми он таассуроти хеле олӣ бардошта, баъди як сол боз дубора ба Тоҷикистон омад.
Шоҳрух Юнусов 23- августи соли 1998 дар ҷамоати деҳоти Пӯлодони шаҳри Конибодом дар оилаи зиёӣ ба ба дунё омадааст. Ӯ то синфи 6 дар МТМУ №25-и шаҳри Конибодом хонда, сипас таҳсилашро дар Литсейи тоҷикӣ-туркии шаҳри Хуҷанд идома дод. Пас аз се соли таҳсил дар Хуҷанд соли 2014 Президенти кишвар муҳтарам Эмомалӣ Раҳмон дар яке аз консертҳо ҳунари Шоҳрухро дида, ӯро барои идомаи таҳсил ба Мактаби байнулмилалии шаҳри Душанбе даъват карданд.
Ҳамин тавр, ӯ ба Душнанбе омад ва баъди хатми мактаб барои идомаи таҳсил ба шаҳри Милани Италия рафт. Ӯ ҳанӯз дар 12-солагӣ дар озмуни “Sanremo Junior 2010” дар Италия сазовори ҷоизаи аввал шуда буд ва ӯро дар ин кишвар ҳамчун операсаро хуб мешинохтанд.
Шоҳрух Юнусов дар оянда нақшаҳои зиёд дорад. Аз ҷумла мехоҳад дар ҳамкорӣ бо намояндагии Тоҷикистон барои муаррифии бештари санъату ҳунар ва таъриху фарҳанги кишвар дар Италия ва дигар давлатҳои аврупоӣ чорабиниҳои фарҳангӣ доир намояд.
