Дар шаҳри Чиангмайи Тайланд Чемпионати Осиё оид ба бокс доир гашта, дар ин мусобиқа 9 муштзани тоҷик иштирок доранд. Дар рӯзи панҷуми мусобиқа кишвари моро Шукрат Саломатов дар вазни 67 кг муаррифӣ карда, комёб гашт.
Дар даври аввал Шукрат Саломатов бо намояндаи Туркманистон Сапармурат Одайев нерусанҷӣ намуд. Дар қувваозмоӣ муштзани тоҷик нисбат ба ҳарифаш дар ринг фаъолтар буд ва ғолибият ба даст овард. Саломатов бо ин пирӯзӣ ба даври дуюми мусобиқа роҳ ёфт.
Дар тӯли панҷ рӯзи мусобиқа ҳамчунин муштзанҳои дигари тоҷик Шоҳобҷон Шукуров дар вазни 71 кг, Миҷгона Самадова дар вазни 57 кг ва Меҳрон Шафиев дар вазни 48 кг ғалаба ба даст оварда, ба даври дуюм роҳ ёфтанд. Мутаассифона Абдумалик Болтаев, ки дар вазни 80 кг рақобат менамуд, дар даври аввал ноком гашт.
Чемпионати Осиё оид ба бокс дар шаҳри Чиангмайи Тайланд аз 28-уми ноябр то 12-уми декабри соли равон миёни муштзанҳои беҳтарини қораи Осиё идома меёбад. Дар мусобиқа 200 муштзан аз 82 кишвари ҷаҳон ширкат доранд, ки 132 нафарашон мардон ва 82 нафар бонувон мебошанд.
