Дар доираи таҷлили Рӯзи пойтахти Ҷумҳурии Тоҷикистон, Мақомоти иҷроияи ҳокимияти давлатии шаҳри Душанбе як чорабинии бошукӯҳ баргузор намуд, ки дар он ғолибони озмунҳои гуногуни касбӣ ва таълимӣ қадрдонӣ гардиданд. Дар миёни онҳо номи як духтари ҷавону умедбахш Нӯшофарин Раҷабзода бо ифтихор садо дод. Ӯ, ки хонандаи синфи 10-и Муассисаи давлатии таълимии «Мактаби байналмилалии президентӣ» аз ноҳияи Сино мебошад, ба унвони ғолиби озмуни «Хонандаи сол - 2025» сазовор дониста шуд.
Майдони санҷиши дониш
Озмуни шаҳрии «Хонандаи сол – 2025», ки рӯзҳои 6 ва 7-уми апрел дар Муассисаи давлатии «Маркази кӯдакон ва наврасони шаҳри Душанбе» баргузор гардид, яке аз муҳимтарин чорабиниҳои таълимӣ ба ҳисоб меравад. Ин озмун на танҳо сатҳи дониши хонандагонро муайян мекунад, балки имконият медиҳад, ки онҳо қобилиятҳои шахсӣ, ҷаҳонбинӣ ва малакаҳои суханварии худро низ нишон диҳанд.
Дар рӯзи аввал иштирокчиён аз фанҳои таълимӣ корҳои тестӣ ва хаттӣ супориданд. Ин марҳила санҷиши ҷиддии донишҳои назариявӣ ва амалии онҳо буд. Рӯзи дуюм бошад, ба намоиши дастовардҳо, малакаи суханронӣ ва қобилияти таҳлил бахшида шуд. Ҳамин тавр, ҳар як иштирокчӣ бояд на танҳо дониш, балки шахсият ва ҷаҳонбинии худро низ муаррифӣ мекард.
Дар чунин рақобати шадид, ки беҳтарин хонандагони пойтахт иштирок доштанд, Нушофарин Раҷабзода тавонист бо истеъдод, омодагии ҷиддӣ ва иродаи қавӣ пешсаф гардад. Дар чорабинии расмӣ ба Нушофарин диплом ва мукофотпулӣ ба маблағи 6000 сомонӣ супорида шуд. Аммо муҳимтар аз ҳама, ин қадрдонӣ эътирофи заҳмат ва истеъдоди ӯст.
Роҳи муваффақият
Ба гуфтаи худи Нушофарин, муваффақият дар ин озмун натиҷаи омодагии пайваста ва банақшагирии дурусти вақт мебошад.
“Ман кӯшиш кардам, ки дониши худро аз фанҳои асосӣ амиқтар намоям. Ҳар рӯз вақти муайянро барои такрор ва омӯзиши маводи нав ҷудо мекардам. Илова бар ин, барои рушди малакаҳои суханронӣ ва фикрронии мантиқӣ низ аҳамият медодам”?,- мегӯяд ӯ.
Ин суханон нишон медиҳанд, ки муваффақият тасодуфӣ нест. Он натиҷаи заҳмати пайваста, худназорат ва талоши доимист. Нушофарин бо навиштани эссеҳо бо забонҳои хориҷӣ, мутолиаи иловагӣ ва машқҳои гуногун тавонист сатҳи дониш ва ҷаҳонбинии худро баланд бардорад.
Дастгирии оила ва омӯзгорон
Дар роҳи расидан ба ин дастовард, нақши омӯзгорон ва волидайн хеле муҳим буд. Нушофарин худ таъкид мекунад, ки маҳз дастгирии онҳо ба ӯ нерӯ бахшид, то ба худ бовар кунад ва аз душвориҳо наҳаросад.
Муаллимаи ӯ, Парвина Назирмадова, Нушофаринро ҳамчун хонандаи боистеъдод ва масъулиятшинос тавсиф мекунад: “Ӯ ҳамеша бо ҷиддият ба ҳар як супориш муносибат мекунад. Қобилияти амиқи таҳлил ва ҳаваси донишомӯзӣ ӯро аз дигарон фарқ мекунад. Ин дастовард натиҷаи меҳнати пайваста ва муҳити мусоиди тарбиявист.”
Ин гуфтаҳо бори дигар собит месозанд, ки ҳамкории зичи мактаб ва оила дар тарбияи насли солим ва донишманд нақши калидӣ мебозад.
Хонандаи бисёрҷанба
Нушофарин на танҳо хонандаи аъло, балки шахсияти ҳамаҷониба рушдёфта аст. Ӯ дорои ахлоқи ҳамида, рафтори намунавӣ ва ҷаҳонбинии васеъ мебошад. Забондонӣ яке аз бартариҳои асосии ӯст: ба ғайр аз забони тоҷикӣ, ӯ забонҳои русӣ, англисӣ, туркӣ ва арабиро низ медонад.
Ҳамзамон, ӯ ба ҳунарҳои дастӣ, аз ҷумла бофтан ва духтан, инчунин пухтупаз шавқ дорад. Қобилияти қироати шеър ва суханварӣ низ дар сатҳи баланд қарор дорад.
Ӯ қаблан дар озмунҳои гуногун иштирок намуда, ба натиҷаҳои назаррас ноил шудааст. Аз ҷумла «Хаттоти беҳтарин» (2023), «Забон донӣ – ҷаҳон донӣ» (2024), Олимпиада аз фанни забони давлатӣ (2025) ва ғайра.
Нушофарин ба ҳамсолони худ чунин маслиҳат медиҳад: “Аз ҳар як фурсат барои омӯзиш истифода баред. Аз душвориҳо наҳаросед, зеро маҳз онҳо моро қавитар месозанд”.
Ин суханон метавонанд барои бисёр ҷавонон илҳомбахш бошанд.
БАХТОВАР
