Соҳибкор ва миллиардери амрикоӣ Илон Маск мехоҳад ба Миррих тақрибан як миллион нафар одамон ва чанд тонна бор фиристад. Дар ин бора ӯ дар чорабинии SpaceX, ки дар шабакаи иҷтимоии Twitter (X) пахш шуд, сухан ронд.
"Барои эҷоди як шаҳри худкифо (дар Миррих) ман фикр мекунам тақрибан як миллион нафар ва чанд миллион тонна бор лозим аст... Ва мо метавонем ин корро дар 20 сол анҷом диҳем",- изҳор доштааст Илон Маск.
Ба гуфтаи миллиардер, одамон ба Миррих фиристода мешаванд, то сайёраро "бомуваффақият мустамлика кунанд". Ӯ гуфт, ки ширкат қасд дорад соли оянда сӯзишвории кайҳонӣ - системаи интиқоли сӯзишворӣ аз як киштии кайҳонӣ ба киштии дигарро ҷорӣ кунад. Дар вақти парвоз ба Миррих камаш 5-6 киштӣ бо ҳамин гуна сӯзишворӣ лозим мешавад.
Маск қайд кард, ки парвозҳо ба Миррих тақрибан дар ду сол як маротиба анҷом дода мешаванд. Соҳибкор гуфт, ки аксари мустамликадорони Миррих шояд ба Замин барнагарданд, вале қайд кард, ки имкони бозгашт бояд таъмин карда шавад.
"Фикр мекунам, ки мо ба мардум имкони баргаштанро медиҳем, зеро эҳтимоли бозгашти онҳо (ба Миррих) бештар аст, агар имкони бозгашт вуҷуд дошта бошад. Аксари одамоне, ки ба Миррих мераванд, эҳтимол ҳеҷ гоҳ ба Замин барнагарданд,"- гуфт ӯ.
Ин миллиардери амрикоӣ мехоҳад сафар ба Миррихро чунон арзон кунад, ки "ҳама тавонанд онро пардохт кунанд".
Ба гуфтаи Маск, одамон бояд ба сайёраҳои дигар ҳаракат кунанд, зеро пас аз чанд сол "дар рӯи замин ҳаёт вуҷуд нахоҳад дошт".
SpaceX ба эҷоди киштии кайҳонии Starship 3 тамаркуз хоҳад кард, зеро барои фатҳи Миррих садҳо чунин киштӣ лозим аст. Аммо Маск дар бораи замони анҷоми он маълумот надодааст. Ширкати миллиардер SpaceX қасд дорад, ки нахуст дар рӯи моҳ пойгоҳ бунёд кунад.
"Тамаддун бояд сатҳи ҳозираи технологияи худро нигоҳ дорад, то он даме, ки Миррих худтаъминкунанда шавад. Албатта ин метавонад дар тӯли 20 сол рӯй диҳад. Агар мо байни сайёраҳо ва баъд байни ситораҳо бошем, тамаддуни мо миллионҳо сол давом хоҳад кард",- изҳор доштааст Илон Маск.
