17-18-уми октябр дар шаҳри Бохтари вилояти Хатлон Форуми байналмилалии сармоягузории «Хатлон-Инвест-2024» баргузор мегардад.

Бино ба иттилои дафтари матбуоти раиси вилояти Хатлон, Форуми байналмилалии сармоягузории «Хатлон-Инвест-2024» бо мақсади баланд бардоштани рақобатпазирии маҳсулоти ватанӣ дар бозорҳои дохилӣ ва хориҷӣ, тақвияти истеҳсолоти ба содирот нигаронидашуда, густариши муносибати тиҷоратии харидорону содироткунандагон тавассути муаррифии имконият ва маҳсулоти содиротии ҷумҳурӣ гузаронида мешавад.

Дар назар аст, ки дар ҷараёни он маҳсулоти кишоварзӣ, ҳунарҳои мардумӣ ва сайёҳии вилоят намоиш дода шаванд. Инчунин байни соҳибкорону сармоягузорон мулоқотҳои инфиродӣ доир шуда, Ёддошти ҳамкорӣ ба тасвиб мерасад.