Директори генералии «Истиқлол»-и шаҳри Душанбе Шаҳзод Сулаймонов бозгашти Игор Черевченкои рус ба вазифаи сармураббии дастаро тасдиқ кардааст.
Бояд гуфт, ки Черевченко қаблан аз моҳи январи соли 2023 то феврали соли 2024 сармураббии “Истиқлол” буд.
“Игор Черевченко боз сармураббии дастаи мо шуд ва мо аз он шодем, ки ӯро ба клуб баргардонидем. Шартнома то охири мавсими имсола баста шудааст. Дар асоси натиҷаи бозиҳо мо тасмим мегирем, ки шартномаро бо мутахассис тамдид кунем ё на. Мо шодем, ки ӯро баргардонидем”,- гуфтааст Сулаймонов дар суҳбат бо хабарнигори Sport24 Владислав Шапиро.
Зимнан, ТВ “Варзиш” ёдовар шудааст, ки пас аз 15 бозӣ «Истиқлол» дар ҷадвали Лигаи олии Тоҷикистон бо 42 имтиёз пешгом аст. Дар зинаи дуюм тими «Хуҷанд» бо 34 имтиёз мавқеъ гирифтааст.
