Як зани 27-солаи сокини шаҳри Истаравшан бо гумони аз беэҳтиётӣ ба марг расонидан ва дар хатар монондани кӯдаки ноболиғаш боздошт шудааст.

Ба навиштаи ВКД, гумонбаршаванда рӯзи 19-уми августи соли 2024, тахминан соати 23:30 дақиқа воситаи механикии сечархаи тамғаи «Fupenq»-ро дар ҳамшафати манзили истиқоматиаш идора намуда, аз уҳдаи идораи воситаи механикӣ набаромада, маҳз аз рӯи муносибати бепарвоёна бо қисмати паси воситаи механикӣ фарзанди хурдсоли 3-солаашро пахш намуда, ҷароҳати ҷисмонӣ расонидааст.

“Номбурда бо мақсади пинҳон доштани ҳодиса фарзанди хурдсолашро дар вазъияти барои ҳаёт ва саломатиаш хавфнок қарор дода, ба ӯ ёрӣ нарасонида, ҳаёташро дар хатар мононда, ба беморхона дастрас накардааст”,- иттилоъ додааст ВКД.

Гуфта мешавад, ки дар натиҷа, фарзанди хурдсолаш аз ҷароҳатҳои бардоштааш ба ҳалокат расидааст.

Ба иттилои манбаъ, нисбати гумонбаршаванда парвандаи ҷиноятӣ бо қисми 1-и моддаи 108 ва қисми 2-и моддаи 127-и Кодекси ҷиноятии Ҷумҳурии Тоҷикистон оғоз карда шуда, тафтишот идома дорад.