Борони пуршиддат ва барфи тар меборад
Ду шабонарӯзи оянда ҳаво дар ҷумҳурӣ якбора сард гашта, боронҳои пуршиддат ва барфи тар меборад. Дар ин бора Кумитаи ҳолатҳои фавқуллода дар такя ба маълумоти Агентии обуҳавошиносии кишвар хабар додааст.
Рӯзҳои 13 ва 14-ноябр дар ҷумҳурӣ ҳавои номусоид дар назар дошта шудааст. Дар водиҳо борони пуршиддат борида, дар минтақаҳои кӯҳӣ барфи тар меборад. Дар ноҳияҳои тобеъи ҷумҳурӣ шамоли хеле пуршиддат вазида, боришот ба амал меояд ва ҳаво якбора сард мешавад.
Дар минтақаҳои кӯҳӣ бар асари боридани борони зиёд сел омада, хатари сангрезиш ва баланд шудани сатҳи оби дарёҳо вуҷуд дорад. Дар робита бо ҳавои номусоид Кумитаи ҳолатҳои фавқуллода сокинони кишварро огоҳ намудааст, ки дар ин рӯзҳо эҳтиёткор бошанд. Касоне, ки барои гарм кардани манзилашон аз ангиштсанг истифода мебаранд, бояд аз дуди он ва баромадани бӯйи газ, ки ба саломатии зиён дорад, эҳтиёт шаванд. Аз таҷҳизоти барқии худсохт барои гармкунии манзилатон истифода набаред, зеро хатари сар задани сӯхтор бар асари расиши ноқилҳо вуҷуд дорад. Дар ин рӯзҳо махсусан кӯдаконро бе назорат нагузоред.
Кумита ба ронандагон тавсия додааст, ки ҳолати техникии мошинҳои худро аз назар гузаронанд ва аз сафар ба минтақаҳои хатарноки навоҳии дурдасти кӯҳӣ бидуни зарурат худдорӣ намоянд.
Ба сокинони ноҳияҳои кӯҳӣ тавсия дода мешавад, ки дар ин рӯзҳо барои чаррондани чорво ба кӯҳ набароянд, аз ҷамъоварии ҳезум ва сайругашт дар мавзеъҳои хатарноки баландкӯҳ худдорӣ кунанд.
Ба аҳолӣ тавсия дода мешавад, ки ҷӯйборҳоро аз партов тоза кунанд, то боиси басташавии пеши роҳи об нагардад.
Дар ҳолати сар задани ҳодисаҳои нохуш фавран ба рақами 112 ва ё телефонҳои 93- 880- 28- 19 ва 223 -13 -11 занг зада, кӯмак пурсед.
