sebiston july new
Аз хона баромада меравам, ота
1490

Беҳуда намегуфтаанд «модар, ки бимурд, падар падарандар гардад». Пас аз марги модарам ман ба ҳақиқати ин масал бовар кардам.

Аз рӯзе, ки модарам аз дунё гузашт, падарам барои ман мисли падарандар шудааст. Марги модарам маро руҳан кушта буд, вале падарам баъди маросими модарам зани дигар гирифта, дубора маро кушт. Гиря кардам, доду фиғон бардоштам, ки монед ақаллан сари соли модарамро гузаронем, аммо падарамро парвои гиряву нолаҳои мани зор набуд.

Ин марди умраш ба ҷое расида он қадар дар орзуи зангирӣ буд, ки фиғони қалби фарзандаш дигар ба гӯшаш намерасид. Пас аз он ки падарам ба хона зан овард, рӯзи мани бемодар аз шаби тор ҳам сиёҳтар шуд. Мехоҳам сарамро гирифта баромада равам, вале падарам бо заҳрханда мегӯяд, ки ба ғайр аз хонаи ман туро дигар ягон ҷо намебардорад.

Медонам, ки падарам дар интернет ҳар рӯз сомонаи "Оила"-ро мехонад, барои ҳамин аз ин минбар ба падари сангдилам гуфтаниам, ки беҳуда пеши роҳамро нагиред. Монед ин ҷисми зиндадаргӯрамро ба ягон гӯшае барам, ки касе маро надонаду нашиносад. Шумо наметавонед маро зӯран нигоҳ доред, агар бо хушӣ аз сари роҳам дур нашавед, аз ғамхонаатон фирор мекунам! Пештар бо ифтихор ба дугонаҳоям дар бораи шумо нақл мекардам, акнун аз онҳо шарм медорам. Маълум мешавад, ки ман одамшинос набудаам, шуморо фаришта гумон мекардам, аммо…

Орзуҳоямро дар дилам куштед, муҳаббати маро ба хоки сиёҳ яксон намудед, дигар дар як хона зистани ману шумо маънӣ надорад, падар. Беҳтараш маро азоб надиҳед, монед бо роҳи худ рафта, ҳаётамро дар ҷойи дигар созам.

Боварӣ дорам, ки холаҳоям маро хор шудан намегузоранд ва ҳамчун ягона нишонаи хоҳари ҷавонмаргашон мисли гавҳараки чашмонашон эҳтиёт мекунанд. Ба шаҳр рафта ба донишгоҳ дохил мешавам ва роҳи худро дар зиндагӣ меёбам.

Ҳанифаи ҷигарсӯхта

Поделиться новостью
Шарҳ
(0)
ҲАНУЗ ШАРҲ НЕСТ
НОМАТОНРО НАВИСЕД
ШАРҲАТОНРО ГУЗОРЕД
Шарҳ
(0)
ҲАНУЗ ШАРҲ НЕСТ
НОМАТОНРО НАВИСЕД
ШАРҲАТОНРО ГУЗОРЕД