Салом ба хонандагони азизи сомонаи "Оила". Узр мехоҳам, ки ному насабамро гуфта наметавонам, зеро намехоҳам наздиконам аз рӯйи ман шуда, хиҷолат кашанд. Розе дорем, ки онро пеши касе ифшо карда наметавонам. Аз ҳамин сабаб хостам бо пинҳон кардани номам сирри махфии худро кушода, маслиҳат пурсам.
Аслан ман зодаи вилояти Суғд мебошам. 17-солаам ва ба наздикӣ тӯйи арӯсӣ дорам. Бо домодшаванда ду сол боз дар фотиҳаем ва якдигарро мешиносем, вале дар боби он ки ман бокира нестам, ӯ чизе намедонад. Ҳарчанд кӯшиш кардам, рози диламро ба ҷавоне, ки бояд ҳамсарам шавад, гуфта натавонистам, вале...
Тасодуфан дар шабакаҳои иҷтимоӣ бо ҷавоне шинос шудам ва байнамон оҳиста-оҳиста муносибатҳои дӯстона ба миён омаданд. Намедонам аз чӣ бошад, ки ман ба ӯ бовар карда, бузургтарин рози худро кушодам.
Акнун ин ҷавон бокира набуданамро додаю дониста маро ба занӣ гирифтанист. Мегӯяд, ки маро дӯст медорад, агар фотиҳаро гардонам, модарашро ба хонаамон хостгорӣ фиристода, маро бо тӯю тамошо ба занӣ мегирад.
Ростӣ, чи кор карданамро намедонам. Илтимос, ба ман маслиҳат диҳед, чӣ кор кунам? Фотиҳаро гардонда ба касе, ки маро бо тамоми айбу гуноҳам қабул карданист, ба шавҳар бароям ё ҳарчи бодо бод гуфта, риштаи тақдирамро бо ҷавоне, ки волидонам маро бо ӯ номзад кардаанд, пайвандам?
