Хушунату зӯроварӣ дар оила аксаран боиси сар задани ҳодисаҳои нохуш мегардад. Вазорати умури дохилии кишвар аз рӯй додани боз як моҷарои хунини оилавӣ хабар додааст.

Дар ноҳияи Рӯдакӣ ҷангу ҷанҷоли як зану шавҳар то ба кордзанӣ расида, оқибатҳои нохушро ба бор овард. Тавре ки ВКД хабар додааст, рӯзи 10-уми сентябр, тахминан соатҳои 21-30-и шом дар ҷамоати деҳоти Чортеппаи ноҳияи Рӯдакӣ байни зани 28-солаи сокини ҳамин ноҳия ва шавҳари 25-солааш, ки зодаи ноҳияи Восеъи вилояти Хатлон аст, дар манзили истиқоматиашон ҷангу ҷанҷол сар задааст. Дар рафти муноқишаи оилавӣ зан бо корди хоҷагӣ ба шавҳараш ҳамла карда, ба пушти сар ва дасти чапи мард корд задааст.

Дар натиҷа, ҷабрдида ҷароҳати ҷисмонӣ бардошта, дар беморхона бистарӣ гардид. Тафтишот аз рӯи ин ҳодиса идома дорад.