Дотсенти кафедраи бемориҳои дарунии Донишгоҳи давлатии тиббии Тоҷикистон ба номи Абӯалӣ ибни Сино Гулнора Ҳоҷиева дар як намоишгоҳи байналмилалӣ соҳиби медали тилло шудааст.
Гулнора Ҳоҷиева барои ихтирооти «Маҷмуи гиёҳҳои шифобахш-Чордору» дар Намоишгоҳи байналмилалии ихтироъкорони Шарқи наздик (IIFME) медали тилло ба даст овардааст.
Гуфта мешавад, ки Намоишгоҳи байналмилалии ихтироъкорони Шарқи наздик дар давлати Кувайт доир гардида, дар он аз 44 давлат ихтироъкорон иштирок кардаанд.
Ёдовар мешавем, ки чунин намоишгоҳи байналмилалӣ ҳамасола доир мегардад. Соли гузашта ин намоишгоҳ 12-15-уми феврал баргузор шуда, дар он аз 43 давлати ҷаҳон намояндагон бо 169 ихтироъ иштирок карда буданд.
