Лутфан бигўед, ки аз нигоҳи шариат гирди қабрро бо панҷара ё девор маҳкам кардан ҷоиз аст? Дар санги мазор ба ғайр аз исми мутаваффо чиҳоро навиштан мумкин аст (масалан, “Бисмиллоҳ” ё номҳои Худованд)? Умуман гузоштани санг болои қабр дурустаст?
Сарвар, ш. Панҷакент.
Посухи домулло Ҷамолиддин Хомӯшӣ
Дар ҳолати зарурат гирди қабрро бо панҷараи чўбин ё девор маҳкам кардан ҷоиз аст. Инчунин болои қабр гузоштани санг ҳамчун нишона машруъ аст. Агар эҳтиёҷ пайдо шавад, навиштани ному насаб ва санаи вафот дар санги қабр боке надорад, аммо навиштани “Бисмиллоҳ” ё номҳои Худованд дар санги қабр хуб нест, зеро эҳтимоли иҳонат нисбати он вуҷуд дорад. Ҳаккокӣ кардани акс бошад, тамоман ҷоиз нест. Кӯшиш кунед, ки аз чунин амал парҳез кунед.
