Бахшида ба 34-умин солгарди Истиқлоли давлатӣ аллакай дар ҳар гӯшаву канори кишвари азизамон Тоҷикистон чорабиниҳои фарҳангӣ-фароғатӣ баргузор гашта истодаанд. Мардуми меҳнатқарини тоҷик бо шукӯҳу шаҳомати хос ин ҷашни бузурги давлатиро таҷлил менамоянд.
Дар мадрасаи таърихии "Кӯкгунбаз"-и шаҳри Истаравшан, ки яке аз мавзеъҳои сертамошои сайёҳон мебошад, таҳти унвони "Истиқлоли Тоҷикистон поянда бод!" чорабинии идона баргузор гардид.
Дар чорабинӣ намояндагони Мақомоти иҷроияи ҳокимияти давлатии шаҳр Беҳрӯз Олимҷонов, Фаррух Қурбонов ва мудири бахши фарҳанг Бахтиёр Аҳмадзода ширкат варзида, ҳозиринро бо ҷашни Истиқлоли давлатӣ табрик намуданд.
Фарҳангиёни кумитаи маҳаллаи Юлдошбек Баротбеков ва маҳаллаи Рустамбек бо пешниҳоди барномаи рангини консертӣ хотири аҳли нишастро шод намуданд. Суруду таронаҳои шӯху ҷаззоби сарояндагони маъруф Фаррух Холматов ва Паҳлавон Бойматов ба чорабинӣ фазои идона бахшиданд.
Дар рафти чорабинӣ сайёҳони зиёд, ки ба тамошои мадрасаи таърихии "Кӯкгунбаз" омада буданд, зери оҳангу таронаҳои миллӣ рақсида, акси хотиравӣ гирифтанд. Ҳамзамон ҳозиринро бо ҷашни истиқлол табрик намуда, таассуроти худро аз ин шаҳри таърихӣ иброз намуданд.
Абдуғаффор ШОДИЕВ
