Раиси Кумитаи сохтмон сабаби ба чанд
кас фурӯхтани як хонаро шарҳ дод
Раиси Кумитаи меъморӣ ва сохтмон Низом Мирзозода сабаби аз ҷониби ширкатҳои сохтмонӣ ба чанд кас фурӯхтани як хонаро шарҳ дод.
Мирзозода зимни нишасти хабарӣ гуфт, маърифати ҳуқуқии шаҳрвандон нисбат ба солҳои қаблӣ нисбатан хеле боло рафтааст, вале то ҳол ҳастанд ширкатҳои биносозе, ки мардумро фиреб медиҳанд.
“Чаро як хонаро ба се-чор кас мефурӯшанд? Сабаб дар он аст, ки шартномаро дар идораи нотариалӣ ба қайд намегиранд... Вақте дар идораи нотариалӣ шартнома баст, аллакай он ҳукми ҳуқуқӣ мегирад ва каси дигар ба идораи нотариалӣ муроҷиат кунад, маълумот мебарояд, ки ин хона фурӯхта шудааст”, - гуфтааст Мирзозода.
Раиси Кумитаи меъморӣ ва сохтмон таъкид кардааст, ки ширкатҳои бинокоре, ки дар корашон камбудиҳо ҷой доранд ва ё кирдорҳои ғайриқонуниашон ошкор карда мешавад, тибқи қонун ҷарима шуда, иҷозатномаи корашон бозпас гирифта мешавад.
