Имрӯз, 18-уми октябри соли 2024 Нависандаи халқии Тоҷикистон Мирзо Шукурзода дар синни 75-солагӣ олами фониро падруд гуфт. Дар ин бора Ато Мирхоҷа, муовини раиси Иттифоқи нависандагони Тоҷикистон хабар дод.
Ҷанозаи нависанда рӯзи 19-уми октябр, соати 10 дар мавзеи Сомониёни ноҳияи Мастчоҳ доир мешавад.
Марҳум узви Иттифоқи нависандагон ва журналистон, Аълочии фарҳанг ва Корманди шоистаи Тоҷикистон буд. Моҳи августи имсол ба ифтихори 33-юмин солгарди Истиқлоли давлатии кишвар унвони баланди адабӣ - Нависандаи халқии Тоҷикистонро аз ҷониби Президенти кишвар соҳиб шуда буд.
Мирзо Шукурзода 1-уми сентябри соли 1949 дар ноҳияи Кӯҳистони Мастчоҳ таваллуд шуда, пас аз хатми мактаби миёнаи зодгоҳаш дар ҳамин мактаб ду сол омӯзгорӣ кардааст.
Сипас, ба бахши рӯзноманигории факултаи филологияи тоҷики Донишгоҳи давлатии Тоҷикистон ба номи Ленин (ДМТ) дохил шуда, баъди хатм муддате дар бахши гуфторҳои адабию драмавии Радиои Тоҷикистон, рӯзномаи «Тоҷикистони Советӣ» ва нашриёти «Адиб» ба фаъолияти журналистӣ ва адабӣ пардохт. Сипас, дувоздаҳ сол дар Ҷумҳурии Исломии Эрон ва Афғонистон кор кардааст. Мавсуф дар ин давра дар Кобул, Теҳрону Душанбе ва Пешовари Покистон 20 китоби илмӣ ва пажӯҳишӣ ба чоп расонидааст, ки “Тоҷикон дар масири таърих”, “Тоҷикон дар қаламрави Ориёно”, “Тоҷикон, ориёиҳо ва фалоти Эрон” ва чанди дигар аз он ҷумлаанд.
Ҳамчунин, дар баргардону таҳияи мавсуф чандин китобҳои мондагори адабию таърихӣ дастраси тоҷикону эрониён гардонида шуда, барои «Донишномаи адаби форсӣ» (Теҳрон, 1996) беш аз 500 мақола навиштааст. Китоби «Тоҷикон дар қаламрави Ориёно»-ро соли 2007 ҳафтавори «Варорӯд» «Китоби беҳтарини сол» эълом карду барои маҷмӯаи «Ҷонпайванд» (2006) сазовори Ҷоизаи ба номи Садриддин Айнӣ (2007) гардидааст.
