Субҳи имрӯз, 2-юми июл дар шаҳри Ваҳдат садамаи мудҳиши нақлиётӣ сар зада, 11 нафар ҷони худро аз даст дода ва 4 тани дигар захмӣ шудаанд.

Бино ба иттилоъи Вазорати корҳои дохилӣ, ин ҳодисаи нохуш соати 6:30-и субҳ дар ҳудуди деҳаи Элок сар зада, системаи манъкунандаи воситаи нақлиёт, яъне тормози “Дулан” якбора аз кор баромадааст. Дар натиҷа “Дулан” ба ду мошини дигар - “Опел Зефира” ва “Тойота Прадо” бархӯрдааст.

Гуфта мешавад, ки бар асари ин садамаи мудҳиш 11 нафар, аз ҷумла ронандаи “Дулан” Фирдавс Абдуллоев, ронандаи мошини “Тойота Прадо” Оқил Палавонов ва 9 нафар мусофирони дар дохили мошинҳо буда ҷони худро аз даст додаанд. Дар ин садама ҳамчунин 4 нафар захмӣ гашта, вазъи саломатии яке аз онҳо вазнин арзёбӣ мешавад.

Вазири корҳои дохилӣ, сардори Раёсати БДА ва додситони шаҳри Ваҳдат сабаби рух додани ин садамаи мудҳишро таҳқиқ мекунанд.