Сарояндаи маъруф Хуҷастаи Мирзовалӣ 18-уми январи соли 1993 дар шаҳри Ҳисор ба дунё омадааст. Ӯ дар оилаи серфарзанд ба воя расида, падараш Фозилов Мирзовалӣ дӯзанда ва модараш Мирзоева Гулҷаҳон муаллима буданд.
Айёми кӯдакии Хуҷаста дар шаҳри Ҳисор гузашта, соли 1999 қадамҳои нахустинашро ба мактаби миёна гузошт. Аз овони кӯдакӣ ӯ ба сурудхонӣ шавқи зиёд дошт. Аввалин шуда маҳз падараш истеъдоди духтарашро дид ва таъкид кард, ки ӯ ба мусиқӣ машғул ва ба мактаби мусиқӣ дохил шавад.
Дере нагузашта падару модари Хуҷаста аз ҳам ҷудо шуданд. Модар бо фарзандонаш ба шаҳри Турсунзода кӯчиданд ва Хуҷаста мактаби миёнаро дар ҳамон ҷо хатм кард.
Баъд аз хатми мактаби миёна соли 2010 Хуҷаста донишҷӯи шуъбаи вокалии Академии Консерваторияи миллӣ шуд. Дар давраи донишҷӯӣ дар чандин чорабиниҳои расмӣ иштирок карда, мукофотҳои зиёде мегирифт.
Дар яке аз чорабиниҳо Президенти кишвар Эмомалӣ Раҳмон суруди Хуҷастаро хуб пазируфта, ба қобилиятҳои сарояндаи ҷавон баҳои баланд доданд ва тасмим гирифтанд, ки ӯро дастгирӣ намоянд.
Барои оғоз, ӯ пешниҳод кард, ки дар Италия таҷриба гузаронад. Ҳамин тавр, соли 2014 Хуҷаста донишҷӯи муассисаи таълимии машҳури мусиқии "Unitre Milano" шуд ва пас аз як сол сароянда боз ба ватан баргашт ва таҳсилро дар Консерватория ва фаъолияти кориашро дар Театри давлатии опера ва балети Тоҷикистон ба номи С. Айнӣ идома дод.
Хуҷастаи Мирзовалӣ дар солҳои аввали эҷодиёти худ сурудҳои эстрадӣ ва арияҳои операро иҷро карда, бо чандин сарояндаҳои машҳури тоҷик якҷо суруд сароидааст.
Ҳамзамон Хуҷаста бо забонҳои хориҷӣ низ суруд сароида, дар давлатҳои берун аз кишвар, аз ҷумла Русия, Арманистон, Қазоқистон, Қирғизистон, Ӯзбекистон, Олмон, Италия, Қатар ва Беларус ба саҳна баромадааст.
