Кумитаи ҳолатҳои фавқуллода ва мудофиаи граждании Тоҷикистон аз сар задани боз як ҳодиси ғамангези ғарқ шудани кӯдакон дар об бар асари бепарвоӣ ва беназоратии волидон хабар додааст.

Ин ҳодисаи нохуш дар ноҳияи Варзоб дар кӯли сунъии паҳлуи дарёи Варзоб рӯй дода, як писарчаи 4–сола ба сабаби ӯро беназорат мондани волидонаш ғарқ шуда, ҷони худро аз даст додааст. Дастаи фаврии наҷотбахшон бо гирифтани ин хабар дарҳол ба ҷойи ҳодиса сафарбар карда шуд ва аз ҷойи ҳодиса ҷасади писараки нокомро аз об берун бароварда ба мақомоти ҳифзи ҳуқуқ супурданд.

Дар 7 моҳи соли равон дар кӯлу дарёву каналҳои кишвар 123 нафар , ки 64 нафарашон кӯдакону ноболиғони 16 сола буданд, ғарқ шудаанд. Соли гузашта дар Тоҷикистон 155 нафар, аз ҷумла 75 нафар кӯдакон ва наврасон ғарқ шуда будан.

Бинобар ин, мо аз тамоми падару модарон хоҳиш мекунем, ки фарзандони худро беназорат нагузоранд ва танҳо ба лаби каналу дарёҳои калон рафтан намонанд, зеро як лаҳзаи кӯтоҳи фориғболӣ метавонад боиси ба сар задани фоҷиаи талхе гардад, ки захми он то абад даво нахоҳад ёфт...