Дар вилояти Суғд давоми соли равон 16 нафар дар кӯлу дарёҳо ғарқ шуда, фавтидаанд. Ҷустуҷӯйи 2 ҷасад то ҳол идома дорад.
Дар ин бора Ҷамшед Кӯчаков, муовини сардори Раёсати КҲФ дар вилояти Суғд иттилоъ додааст. Гуфта мешавад, ки теъдоди ғарқшудагон дар муқоиса бо соли гузашта 8 нафар кам мебошад. Зимнан, аз тарафи наҷотдиҳандагони дастаи махсуси зудамали Раёсати КҲФ дар вилояти Суғд 10 нафар ҳангоми ғарқшавӣ наҷот дода шудаанд.
Гуфта мешавад, ки аз шумораи умумии ғарқшудагон аксарияташон ноболиғон буда, дар мавсими оббозии имсола бештар бо сабаби дар ҷойҳои манъшуда оббозӣ кардан ғарқ шуда, ба ҳалокат расидаанд.
Бештари ҳодисаҳои ғарқшавӣ бошад, дар Сирдарёи шаҳри Хуҷанд, ки ду пули мошингузар дорад, ба қайд гирифта шудааст.
