Дар бораи ҷину шайтон бисёр мегӯянд ва дини мубини ислом ҳам мавҷудияти ин махлуқотро тасдиқ намудааст, вале ростӣ ман тафоути онҳоро аз ҳамдигар намедонам. Мегуфтед, ки Шайтон аз ҷин бо кадом хусусиятҳояш фарқ мекунад?
Аҳлиддин, хонандаи “Оила”.
Посухи домулло Ҷамолиддин Хомӯшӣ:
Бародари азиз, ҷинҳо мавҷудоте ҳастанд, ки аз оташ офарида шудаанд ва қудрати ба ҳар шакл тағйир додани худро доранд. Онҳо аз назари инсонҳо пўшидаанд, бинобар ин, бо номи ҷин номгузорӣ шудаанд. Баъзе ҷинҳо мусулмонанд ва баъзе дигар кофиранд. Шайтон низ аз қабилаи ҷин аст ва он махлуқи нофармони саркаш буда, моломол аз шарорату макру найранг аст. Шайтон душмани инсон аст ва ҳадафаш аз роҳи ҳақ берун кардану гумроҳ намудани фарзанди одам мебошад.
