Дар Тоҷикистон даври дуюми Фестивал-озмуни ҷумҳуриявии телевизионии эҷодиёти халқ «Андалеб» идома дорад.
Бино ба иттилои Вазорати фарҳанги Ҷумҳурии Тоҷикистон, Фестивал-озмуни ҷумҳуриявии телевизионии эҷодиёти халқ «Андалеб» ҳамасола дар мамлакат бо мақсади рушди фаъолияти дастаҳои ҳунарӣ, дарёфти чеҳраҳои нави санъаткор, ҷалби ҳарчи бештари мардум ба фарҳангу ҳунар ва баланд бардоштани нақши ансамблу гурӯҳҳои эҷодӣ дар раванди тарбияи ҷавонону наврасон баргузор мегардад.
Фестивал-озмун дар се давр гузаронида мешавад. Даври якум аз 10-уми июн то 25-уми июл дар сатҳи маҳал баргузор гардид. Даври дуюм аз 1-уми август оғоз ёфт ва то 20-уми сентябр дар маркази вилоятҳо ва шаҳру ноҳияҳои тобеи ҷумҳурӣ доир карда мешавад.
Дар назар аст, ки даври ниҳоии Фестивал-озмуни ҷумҳуриявии телевизионии эҷодиёти халқ «Андалеб» бо баргузории барномаи фарҳангии гулчини фестивал-озмун моҳи октябр дар шаҳри Душанбе баргузор карда шавад.