Дар Душанбе марди 37-сола бо гумони қаллобӣ вобаста ба пешниҳоди манзил боздошт шудааст. Тибқи маълумоти мавҷуда, ӯ бо баҳонаи пешниҳод намудани манзил аз шаҳрвандон маблағҳои калон гирифта, онҳоро барои эҳтиёҷоти шахсии худ сарф мекардааст.
Дар рафти тафтишот то имрӯз чор ҳолати эҳтимолии қаллобӣ ба маблағи умумии 5,5 миллион сомонӣ ошкор шудааст. Нисбат ба гумонбар парвандаи ҷиноятӣ оғоз гардида, тафтишот идома дорад.
Ин ягона мавриди қаллобӣ дар бозори манзили Душанбе нест. Қаблан роҳбари як ширкати сохтмонӣ низ боздошт шуда буд. Ӯ ба фиреби беш аз 160 нафар ба маблағи тақрибан 50 миллион сомонӣ муттаҳам мешуд. Тибқи маълумоти тафтишотӣ, як манзил ба чанд нафар фурӯхта шудааст.
Мавридҳои мазкур бори дигар масъалаи ҳифзи ҳуқуқи харидорон ва шаффофияти муомилоти манзилиро ба миён меоранд. Мақомоти ҳифзи ҳуқуқ таҳқиқи ҳолатҳои зикршударо идома медиҳанд.
