Мақомот дар Душанбе ду кӯдаки хурдсоли як модарро барои маҷбур кардани онҳо ба талбандагӣ аз ӯ гирифта, ба мактаб-интернат супоридаанд.
Дар ин бора Раёсати корҳои дохилӣ дар Душанбе иттилоъ дода, гуфтааст, “шаҳрванд Тағоева М., ки модари ду кӯдаки хурдсол аст, онҳоро ба талбандагиву оворагардӣ водор сохта, аз ин ҳисоб манфиати пулӣ ба даст меовард”.
Ин ниҳод гуфтааст, ки бо назардошти ин ҳолат, нисбати номбурда моддаи 73-и Кодекси оиларо, ки гирифтани кӯдакро бе маҳрум кардан аз ҳуқуқи падару модарӣ иҷоза медиҳад, татбиқ карда, бо қарори суд фарзандонашро аз ӯ гирифтаанд.
Манбаъ гуфтааст, ки кӯдакон дар Мактаб-интернати №1 барои кӯдакони ятим ва бепарастори шаҳри Душанбе ба таълиму тарбия фаро гирифта шуданд.
