Бонки миллии Тоҷикистон баъди паҳн шудани чанд навори пулҳои қалбакӣ дар шабакаҳои иҷтимоӣ аз шаҳрвандон хостааст, ки дар вақти додугирифт эҳтиёткор бошанд.

Чанд нафар корбари шабакаҳои иҷтимоӣ, бахусус ронандагони таксӣ шикоят кардаанд, ки муштариён ба онҳо пулҳои қалбакӣ додаанд. Дар ин пулҳо ба ҷойи Бонки миллии Тоҷикистон “Чиптаи бонки Шӯхӣ" навишта шудааст.

Бонки миллии Тоҷикистон бидуни овардани номи касе навиштааст, ки баъзе ашхос ё гурӯҳ кӯшиш мекунанд, ки бо истифода аз техникаи нусхабардории ранга бо ҳар роҳу восита пулҳои қалбакиро ба муомилот бароварда, мардуми ноогоҳро фиреб диҳанд.