Солҳои охир теъдоди нафароне, ки ба ҷарроҳии пластикӣ рӯ меоранд, дар ҳоли афзоиш аст. Маълум гардид, ки дар Тоҷикистон ҷарроҳии пластикии бинӣ ва рӯй, ки бо номи «фейслифтинг» машҳур аст, бештар анҷом дода мешавад.
Баъзан бо маслиҳати косметологҳо беморон барои анҷом додани ҷарроҳии пластикӣ розӣ мешаванд. Аммо бобати зарари ҷарроҳии пластикӣ ҳангомаҳо зиёданд, ки касро ба андеша водор месозанд.
Дар мавриди суду зиёни ин гуна амалиёт Эркин Исмоилов, ҷарроҳи пластикии шуъбаи ҷарроҳии пластикии маркази ҷумҳуриявии илмии ҷарроҳии дилу рагҳо чунин маълумот пешниҳод намуд.
Ҷарроҳии пластикии рӯй
Фейслифтинг (таранг кардани пӯсти рӯй) душвортарин ҷарроҳии пластикӣ ба ҳисоб меравад, ки он 4 – 5 соат тӯл мекашад. Ин навъи ҷарроҳиро низ бархе бо мақсади бартараф кардани нуқсонҳои дурушти рӯй, гурӯҳи дигар барои зебоӣ ва тағйир додани тарҳи рӯй истифода мебаранд. Анҷом додани ин намуди ҷарроҳӣ пас аз 28 - солагӣ иҷозат дода мешавад. Дар Тоҷикистон бештар нафарони аз 40 - сола боло аз ин навъи ҷарроҳӣ кор мегиранд. Синни мувофиқ барои гузарондани чунин амалиёти ҷарроҳӣ 40 - 45- солагӣ аст.
Ду намуди ин навъи ҷарроҳӣ маъмул аст. Амали ҷарроҳӣ аз рӯйи пӯсту бофтаҳои дохилӣ ва кашидани пӯсти рӯйи бофтаҳои чуқур, ки одатан онро SMAS – система меноманд. Муҳлати ҷарроҳии навъи якум то як сол аст, ки ёзиши зиёди пӯстро ба вуҷуд меорад. Ҷарроҳии дувум то 8 –10 сол ва ё умрбод боқӣ мемонад.
Оризаҳои баъди ҷарроҳӣ
Пас аз ҷарроҳӣ оризаҳо ба амал меоянд, ки то дергоҳ боқӣ мемонанд. Ёзиши пӯсти рӯй зиёд гардида, баъзан ба торҳои асаб латма мезанад. Агарчи чунин ҳолат муваққатӣ ҳам бошад, то бартараф гардидани он таъсири манфии хешро мегузорад. Инчунин, баъзан дар рӯй осори он боқӣ монда, аз беэҳтиётӣ метавонад заҳролудшавии хун ба вуқӯъ ояд.
Дар сурати анҷом додани ҷарроҳии пластикии рӯй набояд дар як вақт гирифтани пӯсти изофаи пилкони болоро амалӣ намуд, зеро пас аз ҷарроҳӣ рӯй варам карда, имкони дубора халта задани пӯст вуҷуд дорад. Дар як муддат анҷом додани ин ду намуди ҷарроҳӣ қатъиян манъ аст. Ҳамчунин, пас аз истифодаи сӯзандору барои зебоӣ ҷарроҳии пластикӣ набояд гузаронда шавад.
Фоидаи ҷарроҳии пластикии бинӣ
Дар соҳаи тиб ду навъи ҷарроҳии бинӣ мавҷуд аст: ринопластика ва септопластика. Ҳангоми афтидан ва ё ҷароҳат бардоштан бинӣ осеб дида, дар бисёре аз мавридҳо каҷ мешавад. Ҳамчунин, миёнадевори бинӣ шакли худро тағйир дода, роҳи нафасро маҳкам месозад. Дар ин сурат анҷом додани ҷарроҳии септопластика лозим меояд. Яъне, бо роҳи ҷарроҳӣ тағояки бинӣ рост ва сӯрохиҳои он васеъ карда мешавад, ки дар охир нафаскашии бемор озод мегардад. Ринопластика бо мақсади зебоиофарӣ анҷом дода мешавад: бинии калон ва ё аз ҳад хурдро ба тариқи ҷарроҳӣ муътадил карда, барҷастагии онро бартараф месозанд ва ғайра. Дар Тоҷикистон писарону духтарони аз 18 - сола боло аз ин навъи ҷарроҳӣ бештар истифода мебаранд.
Зиёни ҷарроҳии пластикии бинӣ
Ҳама намуди ҷарроҳии пластикӣ хатарзост. Ҷарроҳии пластикии бинӣ низ сарфи назар аз касбияти баланди табиби соҳа аз ин рӯйхат истисно нест. Тадқиқотҳо нишон додаанд, ки ҳеҷ як ҷарроҳи пластикӣ наметавонад 100 % кафолат диҳад. Пас аз ҷарроҳӣ мондани пай ва ё то дергоҳ боқӣ мондани варами он, нафастангӣ ва ғайра метавонад ба амал ояд. Дар ҳолати риоя накардани тавсияҳои духтур метавонад нуқсоне сар занад. Муҳимтар аз ҳама, ҷарроҳ бояд донад, ки аз ҳад зиёд хурд кардани бинӣ манъ аст. Зеро пӯсти бинӣ тира гардида, оризаҳо пайдо хоҳанд шуд. Барои бинии калонро муътадил кардан ҷарроҳӣ бояд ду маротиба сурат гирад, вале фосилаи байни онҳо набояд аз як сол кам бошад. Дар акси ҳол, оризаҳо пайдо гардида, кашиши пӯст таранг хоҳад шуд. Инчунин, то синни 18 ҷарроҳии ринопластика набояд анҷом дода шавад. Чунки дар ин давра устухонҳо дар ҳоли инкишоф қарор доранд ва бо мурури замон бинии хурдкардашуда ба ҷисми аллакай бузург мутобиқат нахоҳад кард.
СУДУ ЗИЁНИ ҶАРРОҲИИ ПЛАСТИКӢ
Бонувони зиёдеро вохӯрдан мумкин аст, ки назар ба синну солашон ҷавон менамоянд. Пӯсти рӯяшон поку пурҷилло буда, бидуни ожанг мебошад. Вақте аз онҳо сирри ҷавон монданашонро пурсон мешавед, ҳар кадоме шарҳи худро доранд. Аммо қоидаҳои умумие низ вуҷуд доранд, ки пеши роҳи пиршавии шуморо мегиранд:
Қоидаи аввал: кӯшиш намоед, то хӯрок ҳазм шавад
Рӯдаҳо бояд мисли соат кор кунанд. Аз қабзият дӯрӣ ҷӯед. Зеро қабзият, ин заҳролудшавии бадан аст. Рӯдаҳои мо ҳамсони решаҳои дарахтанд, агар онҳо солим бошанд, организм мутобиқи он фаъолият менамояд ва инсон ҳам умри дароз хоҳад дид. Солимии рӯдаҳои мо, пеш аз ҳама, ба хӯрок вобаста аст. Сабзавот ва меваҳои тарру тоза, оби тоза, субҳгоҳон нӯшидани чойи бобуна ба зебоии пӯст таровати бештар мебахшад. Дар хотир бояд дошт, ки ҳолати пӯст то андозае аз миқдор ва сифати оби нӯшокии мо вобастагӣ дорад.
Тозагии пӯст низ аз ин раванд вобаста аст. Барои нигоҳ доштани ҷавонӣ ва бартараф сохтани мушкилиҳое, ки ба солимии бадан рабт дорад, ҳамарӯза 1,5-2 литр оби табиӣ бинӯшед. Обе, ки ҷисми шуморо аз энергия ва оксиген пур мекунад. Дар натиҷа пӯсти шумо ҳамвор, ҷилодор ва форам хоҳад шуд.
Қоидаи дуюм: хоби хуш
Набудани хоб душмани бадтарини зебоии пӯст ва мӯй аст! Кӯшиш кунед, ки дар вақти муайян хоб рафта, субҳ аз хоб сабук бархезед. Хоби хуш барои ашхоси калонсол аз соати 21.00 то 6.00 муайян шудааст. Пас аз хоби бароҳат маълумоти нолозим аз хотираи инсон худ пок мешавад.
Қоидаи сеюм: ҳавои тоза - дӯсти зебоист!
Агар шумо тамоми рӯз дар утоқи корӣ менишинед, пас, ҳадди аққал баъд аз кор пиёда ба хона равед. Дар хона тирезаҳоро ҳамеша кӯшода нигоҳ доред. Дар зимистон бештар ин амалро иҷро намоед. Рӯзҳои истироҳат, бештар пиёда ва дар ҳавои тоза қадам занед.
Сирри дигари нигоҳ доштани зебоӣ ва ҷавонӣ ин аз қабули ҳаммом аст. Пӯст организми зинда аст ва дар он токсинҳо (моддаҳои заҳролуд) ҷамъ мешаванд, ки зарур аст аз онҳо пок шуд. Ин ҳолатро метавон танҳо бо роҳи буғ бартараф намуд.
Қоидаи чорум: Витаминҳо!
Дар фасли зимистон на ҳамаи мо имкони харидорӣ намудани сабзавоту меваҷотро дорем. Ва ҳам дар ин фасл теъдоди витаминҳои меваю сабзаҷот низ камтар аст, зеро онҳо дар ин мавсим гармхонаианд. Пас, кадом навъи маҳсулотҳоро дар фасли сармо метавон истеъмол намуд, то онҳо аз витаминҳо бой бошанд?
Дар зимистон, витаминҳои бештар дар меваҳои хушк мавҷуданд. Бештар нӯшобаҳоеро бинӯшед, ки аз меваҳои хушк омода гардидаанд. Инчунин, ҳангоми наҳорӣ аз ярмаи ҷав, зардолуву мавизи хушк истеъмол намоед. Аз хуч нӯшоба омода карда, ба таври мунтазам бинӯшед.
Агар ҳаррӯз ярмаи ҷав, помидор, афлесун, чой ва йогурт истеъмол намоед, дар ин сурат шумо метавонед пирӣ ва хастагиро фаромӯш созед. Ба варзиш машғул шуданро низ набояд фаромӯш сохт. Мутахассисон дақиқ кардаанд, ки агар маҳсулотҳои зерин: лӯбиё, караму гулкарам, ярмаи ҷав (овсянка) афлесун, каду, моҳӣ, чойи сиёҳу кабуд, помидор, гӯшти кабк, чормағз ва йогуртро дар як ҳафта на камтар аз 4 маротиба тановул намоӣ, на танҳо ҷавон мемонӣ, балки аз фарбеҳшавӣ низ эминӣ.
Қоидаи панҷум: кайфияти дарунӣ ва ҳолати рӯҳӣ!
Як сирри дигари нигоҳ доштани ҷавонӣ, ин пешгирӣ аз эҳсосоти бад мебошад. Ин хосият муҳимтарин талаботи зебову ҷавон мондан аст.
Ба шумо қиёмеро тавсия медиҳем, ки онро "қиёми ҷавонӣ" ном мебаранд. Маҳсулотҳои таркибии он ҳуҷайраҳоро ҷавон менамояд. Ин навъ қиёмро аз синни 30-солагӣ истеъмол намудан мумкин аст:
200 гр бобуна, 100 гр тугмагул (бессмертник), 100 гр чойкаҳак ва 100 гр навдаи тӯсро майда карда, дар чойник чой дам мекунем. Як истаконӣ шаб пеш аз хоб ва субҳ ним соат пеш аз хӯрок онро менӯшем. Нӯшобаро давоми як моҳ нӯшидан лозим аст. Истифодаи такрорӣ пас аз 5 сол муқаррар шудааст.
