Донишгоҳи давлатии омӯзгории Тоҷикистон ба номи Садриддин Айнӣ қабули довталабони чиниро дар шакли таҳсили фосилавӣ ва ҳузурӣ дар зинаи магистратура аз аввали соли нави таҳсил оғоз менамояд. Дар ин бора Донишгоҳ дар саҳифаи фейсбукии худ навиштааст.
Гуфта мешавад, ки ин ҳамкорӣ дар асоси созишномаи ҳамкорӣ миёни Донишгоҳи давлатии омӯзгории Тоҷикистон ба номи Садриддин Айнӣ ва Ширкати “Технологияи таълими Shangdon Daliangzao”-и назди Донишгоҳи омӯзгории Ҷумҳурии Халқии Чин ба роҳ монда шудааст.
Созишномаи мазкур дар асоси дархост ва интихоби беш аз 1000 хатмкунандаи муассисаҳои таҳсилоти миёна ва коллеҷҳои Ҷумҳурии Мардумии Чин таҳия ва тасвиб шуда, раёсати Донишгоҳи давлатии омӯзгории Тоҷикистон ба номи Садриддин Айнӣ ба таҳсил фаро гирифтани ин хатмкунандагонро дар зинаи магистратура ба роҳ мемонад.
Мавриди тазаккур аст, ки қабули ҳуҷҷатҳои хатмкунандагони муассисаҳои таҳсилоти олии Чин дар зинаи магистратура дар ихтисосҳои интихобиашон бо забонҳои русиву англисӣ дар асоси қонун таҳия ва қабул карда шуда, тибқи шартнома ба таҳсил фаро гирифта мешавад.
