Тобистон барои пӯсту мӯй на ҳамеша бетаъсир мегузарад. Офтоби зиёд, нурҳои ултрабунафш, оби баҳр, шамол, оби хлордор ва гармии ҳаво метавонанд боиси хушкшавӣ, пӯстпартоӣ, хирашавӣ, зудшиканӣ ва ҳатто зиёд шудани рехтани мӯй шаванд. Пас аз анҷоми фасли гармо вақти он расидааст, ки ба барқарорсозии онҳо диққати бештар диҳем.
Пӯст ба намнокӣ ниёз дорад
Қадами аввал - нигоҳубини нарму эҳтиёткорона аст. Душро бо оби гарм не, балки бо оби ширгарм қабул кунед ва муддате аз исфанҷҳои сахт, скрабҳо ва воситаҳои тозакунандаи таъсирнок худдорӣ намоед. Баъди душ дар чанд дақиқаи аввал ба пӯст крем ё малҳами намноккунанда молед. Маҳсулоте, ки дар таркибашон керамидҳо, глицерин, сквалан ва пантенол доранд, барои барқарор намудани қабати муҳофизатии пӯст муфиданд.
Агар пӯст сурх, сӯзон ё сахт пӯстпарто шуда бошад, истифодаи воситаҳои таъсирнок, аз ҷумла маҳсулоти дорои кислотаҳо, бояд муваққатан қатъ карда шавад. Барои пӯсти ҳассоси рӯй нигоҳубинро содда кардан беҳтар аст: тозакунии мулоим, креми намноккунанда ва воситаи муҳофизаткунандаи офтоб кофист.
Муҳим аст, ки муҳофизат аз офтобро ҳатто дар тирамоҳу зимистон идома диҳем. Нурҳои ултрабунафш аз абрҳо мегузаранд ва барфи сафед онҳоро хуб инъикос мекунад. Барои қисматҳои кушодаи пӯст истифодаи маводи муҳофизатии дорои SPF 30–50+ тавсия мешавад.
Мӯй низ ба нигоҳубини махсус ниёз дорад
Нурҳои ултрабунафш, намаки баҳр, шамол, оби хлордор ва ҳарорати баланд қабати берунии муҳофизатии мӯйро осеб медиҳанд. Дар натиҷа мӯй намии худро гум карда, хира, хушк, гиреҳзадаву зудшикан мешавад. Барои барқарорсозӣ шампуни мулоим истифода баред ва ҳангоми шустан бештар ба пӯсти сар диққат диҳед. Пас аз ҳар шустан истифодаи кондитсионер муфид аст. Ҳафтае як ё ду маротиба аз ниқоби махсус барои мӯйҳои осебдида истифода бурдан мумкин аст. Барои нӯгҳо ва дарозии мӯй кондитсионер ё зардобаи махсус ба кам шудани шиканандагӣ ва осонтар шона кардан мусоидат мекунад.
Дар чанд ҳафтаи баъдӣ истифодаи асбобҳои мӯйҳамворкуниро кам кардан беҳтар аст. Ҳангоми бо фен хушк кардан ҳарорати мӯътадилро интихоб намуда, аз воситаи муҳофизаткунандаи гармӣ истифода баред. Агар нӯгҳои мӯй сахт дуқисма ва шикаста бошанд, кӯтоҳ кардани онҳо роҳи самараноктар буда метавонад, зеро воситаҳои косметикӣ мӯйи аллакай осебдидаро пурра барқарор карда наметавонанд. Мӯйи тар хеле осебпазир аст. Аз ин рӯ, баъди шустан онро бо сачоқ сахт намолед, балки танҳо нарм хушк кунед. Баъд аз каме хушк шудани мӯй онро шона кунед.
Рехтани зиёди мӯйро нодида нагиред
Ба таври муқаррарӣ инсон метавонад дар як рӯз то 100 тори мӯяшро аз даст диҳад ва тобистон ин миқдор метавонад каме зиёдтар шавад. Аммо агар зиёда аз ду моҳ пай дар пай ҳар рӯз беш аз 150 тор мӯй резад, зичии мӯй кам шавад, ҷойҳои бемӯй пайдо шаванд ё хоришу пӯстпартоии сар ба назар расад, ба трихолог муроҷиат кардан лозим аст.
Баъзан ислоҳи тарзи зиндагӣ, ғизои дуруст ва пур кардани норасоии моддаҳои зарурӣ мушкилро ҳал мекунад. Вале рехтани мӯй метавонад нишонаи бемориҳои ҷиддитар, аз ҷумла алопетсияи андрогенӣ, баъзе равандҳои аутоиммунӣ ё норасоии оҳан, руҳ ва витамини D бошад.
Шампунҳои маъмул бо навиштаҷоти «зидди рехтани мӯй» наметавонанд сабаби аслии мушкилро пурра бартараф кунанд. Истифодаи иловаҳои ғизоӣ низ танҳо дар сурати тасдиқ шудани норасоии микроэлементҳо зарур аст.
