Муродулло Носиров, омӯзгори фанни физика ва математикаи муассисаи таҳсилоти миёнаи умумии №124-и ноҳияи Фирдавсии шаҳри Душанбе барои хизматҳои арзанда ва фаъолияти намунавӣ, ноил гардидан ба дастовардҳои пурсамари меҳнатӣ, саҳм гузоштан дар пешбурди рушди соҳаи маориф ва таълиму тарбияи насли наврас бо Сипосномаи мақомоти иҷроияи ҳокимияти давлатии ноҳияи Фирдавсӣ ва мукофоти пулӣ дар ҳаҷми 10 ҳазор сомонӣ қадрдонӣ гардид. Дар ин бора Сарраёсати маорифи шаҳри Душанбе дар саҳифи фейсбукии худ навишт.

Мавриди зикр аст, ки 4 майи соли ҷорӣ дар ҷаласаи мушовараи Сарраёсати маорифи шаҳри Душанбе омӯзгор Носиров бо нишони "Аълочии маориф ва илми Тоҷикистон" сарфароз гардонида шуд.

Муродулло Носиров дар даври дуюми Олимпиадаи байналмилалии Фаронса сазовори ҷойи аввал гардида буд. Олимпиадаи мазкур 18 феврал дар Донишгоҳи байналмилалии Марсели Фаронса аз фанҳои математика, физика ва химия бо иштироки 112 нафар омӯзгорони беҳтарини Русия, Фаронса, Полша, Ветнам, Юнон, Тоҷикистон ва дигар давлатҳо баргузор карда шуд.

Ҳамзамон, номбурда дар Олимпиадаи байналмилалии Авруосиё, ки моҳи январи соли 2023 тариқи маҷозӣ (онлайн) аз фанҳои физика, математика ва химия доир гардида буд, сазовори ҷойи сеюм, диплом ва мукофоти пулӣ гардида буд. Дар он 1328 нафар омӯзгорони Тоҷикистон, Туркманистон, Узбекистон, Туркия, Русия, Қазоқистон ва Афғонистон иштирок доштанд.