Дар шаҳри Тошканд чемпионати Ассотсиатсияи футболи Осиёи Марказӣ (CAFA) миёни мунтахабҳои то 17-сола идома дорад. Дар мусобиқа мунтахабҳои Тоҷикистон, Ӯзбекистон, Туркманистон, Қирғизистон ва Афғонистон иштирок доранд.

Бино ба иттилои ТВ “Варзиш”, мунтахаби наврасони Тоҷикистон (U-16) таҳти роҳбарии Ҷаъфар Ахмедов чемпионати Ассотсиатсияи футболи Осиёи Марказӣ (CAFA)-ро бо пирӯзӣ муқобили Туркманистон бо ҳисоби 5:1 оғоз карда буд.

Дирӯз дар даври сеюми мусобиқа тими мо бо ҳамсолони худ аз Қирғизистон вориди майдони рақобат шуданд. Бозӣ дар варзишгоҳи “Дӯстлик” доир шуда, бо ҳисоби 4 бар 0 ба суди мунтахаби Тоҷикистон анҷом ёфт.

Аз ҳайати тими мунтахаби Тоҷикистон голҳоро Сиёвуш Назаров дар дақиқаҳои 3-юм ва 57-ум, Алиҷон Шуҳратҷонзода дар дақиқаи 17-ум ва Биҳиштӣ Раҷабзод дар дақиқаи 61-ум ба самар расониданд. Сиёвуш Назаров, ки дар бозӣ бо Туркманистон дубл карда, беҳтарин бозигари вохӯрӣ эътироф шуда буд, беҳтарин бозигари майдон дониста шуд.

Ёдовар мешавем, ки дар даври навбатӣ, имрӯз, 11-уми апрел мунтахаби наврасони то 16-солаи Тоҷикистон бо ҳамтоёни худ аз Афғонистон бозӣ хоҳад кард.