Бо Қарори Рустами Эмомалӣ, Раиси шаҳри Душанбе, Муассисаи таҳсилоти миёнаи умумии №8-и ноҳияи Исмоили Сомонии шаҳри Душанбе ба номи Бозор Собир номгузорӣ карда шуд.
Дар ин бора Раёсати маорифи шаҳри Душанбе хабар додааст.
Дар хабар ҳамчунин омадааст, ки бо мақсади гиромидошти поси хотири шоири шинохтаи тоҷик, дорандаи ордени «Ситора»-и Президенти Ҷумҳурии Тоҷикистон, барандаи ҷоизаи давлатии ба номи Абӯабдуллоҳ Рӯдакӣ - Бозор Собир таҳти унвони «Шоиру шеъре агар ҳаст,…» маҳфили адабии бошукӯҳу хотирмоне баргузор гардид. Дар маҳфил намояндагони Мақомоти иҷроияи ҳокимияти давлатии шаҳри Душанбе, Сарраёсати маорифи шаҳри Душанбе, арбобони шинохтаи илму адаб ва санъати тоҷик, омӯзгорон ва хонандагони фаъоли муассисаҳои таълимии пойтахт иштирок намуданд.
Дар идомаи чорабинии адабӣ чеҳраҳои шинохтаи санъату фарҳанги тоҷик баромад намуда, аз эҷодиёти рангину пурғановати шоири тавонои тоҷик, зиндаёд Бозор Собир шерҳо қироат намуданд ва сурудҳои дилнишин суруда поси хотири ин ситораи тобноки адабиёти муосири тоҷикро гиромӣ доштанд.
