Қаҳрамони Тоҷикистон “Истиқлол”-и Душанбе бозии охирини марҳилаи гурӯҳии худро дар Лигаи қаҳрамонҳои дуюми КФО-2025/26 анҷом дод.

Бино ба иттилои ТВ “Варзиш”, бозии ниҳоии “Истиқлол” бо бошгоҳи “Гоа”-и Ҳиндустон доир шуд. Вохӯрии дастаҳо дар варзишгоҳи «Ҷавоҳарлал Неру»-и Гоа баргузор шуда, бо ҳисоби 2 бар 1 ба суди “Истиқлол” анҷом ёфт.

Ҳисоб дар дақиқаи 8-уми бозӣ аз ҷониби Деян Дражич ба фоидаи “Гоа” кушода шуд. Дар дақиқаи 53-юми бозӣ Шон Пол Камолафе ҳисобро баробар намуд. Пас аз 3 дақиқа аз зарбаи пеналтӣ Амирбек Ҷӯрабоев голи ғалабаоварро барои “Истиқлол” ба самар расонид.

Дар бозии дигари гурӯҳ “Ал-Наср” дар шаҳри Риёз бо ҳисоби бузурги 5 бар 1 муқобили “Ал-Завраа” пирӯзӣ ба даст овард.

“Истиқлол” дар панҷ бозии анҷомдода дар марҳилаи гурӯҳӣ аз “Ал-Наср” бо ҳисоби 5 бар 0 дар Риёз, аз “Ал-Завраа” бо ҳисоби 2 бар 1 дар Бағдод, аз “Ал-Наср” бо ҳисоби 4 бар 0 дар Риёз мағлуб шуда, ғалабаро бар “Гоа” бо ҳисоби 2 бар 0 ва “Ал-Завраа” бо ҳисоби 2 бар 1 дар Ҳисор ба даст овард.

Қобили зикр аст, ки пас аз бозиҳои даври охир дар гурӯҳи “D” тими “Ал-Наср” бо 18 имтиёз садрнишин буда, роҳхати марҳилаи плей-оффро ба даст овард. “Ал-Завраа” бо 9 имтиёз дар зинаи дуюм мавқеъ гирифта, роҳхати марҳилаи плей-оффро соҳиб шуд. “Истиқлол” дар зинаи сеюм бо 9 имтиёз мавқеъ гирифт ва бо натиҷаи таносуби тӯбҳо аз гурӯҳ ба даври плей-офф роҳ ёфта натавонист. “Гоа” бидуни имтиёз дар зинаи охири гурӯҳ мусобиқаро ҷамъбаст намуд.