Дар шаҳри Конибодом шаби 8 ба 9-уми декабри соли равон 6 узви як оиларо бераҳмона ба қатл расонидаанд. Ҳодиса дар маҳаллаи Шӯрқӯрғони деҳаи Шӯробқалъаи ҷамоати Фирӯзаобаи шаҳри Конибодом рӯй додааст.

Мақомоти ҳифзи ҳукқуқ ин ҳодисаро расман шарҳ надодаанд, вале ба навиштаи расонаҳо ҷасади 6 узви як оила, аз ҷумла 4 кӯдакро субҳи рӯзи 9-уми декабр аз манзили истиқоматиашон пайдо кардаанд. Гуфта мешавад, ки кушташудаҳо узви оилаи Неъматовҳо буда, сокинони маҳаллаи Шӯрқӯрғони деҳаи Шӯробқалъаи шаҳри Конибодоманд. Ҷасади сардори оила Неъматов Наимҷон Норматовичи 37-сола дар рӯи ҳавлӣ дар дарахт овезон пайдо шудааст. Ба гуфтаи шоҳидон, дар сару рӯйи Неъматов Наимҷон осори зарбу лат мушоҳида шудааст.

“Ҷасади аъзои дигари оила, аз ҷумла, ҳамсараш Неъматова Нафиса Набиевнаи 33-сола, фарзандонаш Неъматова Аминаи 13-сола, Фотима ва Зуҳро Неъматоваҳои 10-сола ва Муҳаммадюсуф Неъматови 2-сола дар рӯи хона бо “нишонаҳои бӯғӣ кардан” дарёфт шудааст”,-омадааст дар хабар.

Оилаи Неъматовҳо аз ҳисоби муҳоҷират зиндагиашонро пеш мебурдаанд ва Наимҷон Неъматов шаҳрвандии Русияро доштааст.