Маркази матбуоти Кумитаи давлатии амнияти миллии Ҷумҳурии Тоҷикистон хабари боздошти шаҳрвандон дар робита ба кӯшиши амали террористӣ дар Наврӯзро беасос номид.
Ин ниҳод бо пахши як изҳорот гуфт, баъзе воситаҳои ахбори оммаи ба ном мустақил ба таҳрифи вазъият даст зада, ҳар гуна маълумоти носанҷида ва иғвоангезро оид ба дастгир намудани шаҳрвандон дар алоқамандӣ бо кӯшиши анҷом додани амалҳои террористӣ дар арафаи ҷашни Наврӯз паҳн месозанд.
«Таъкид менамоем, ки ин хабарҳо асоси воқеӣ надоранд»,- гуфта мешавад дар хабари маркази матбуоти Кумитаи давлатии амнияти миллии Ҷумҳурии Тоҷикистон.
Қаблан, хабаргузориҳое, чун Радиои Озодӣ, “Азия Плюс” ва Рейтерз хабар дода буданд, ки маъмурони Кумитаи давлатии амнияти миллӣ чанд сокини кишварро ба гумони омодагӣ ба ҳамлаи террористӣ боздошт кардаанд. Хабаргузориҳои “Рейтерс” ва “Азия-Плюс” аз боздошти 9 кас хабар дода буданд. Озодӣ ин шумораро 20 кас гуфт.
