Кумитаи ҳолатҳои фавқулода ва мудофиаи гражданӣ хабар дод, ки давоми як шабонарӯзи гузашта дар қаламрави кишвар шамоли шадид, ҷамъшавии селу сангпораҳо ба қайд гирифта шудааст.

Санаи 21-уми апрел, соати 09:50-и субҳ дар 423 ва 427 км роҳҳои мошингарди Душанбе - Дарвоз - Ванҷ - Хоруғ сангрезӣ ба қайд гирифта шудааст. Дар натиҷа ин қитъаҳо баста ва ҳамон рӯз тозаву роҳ кушода шудааст.

Инчунин, дар натиҷаи обшавии шадиди барф, соати 10:43 дақиқа дар 29 км роҳи автомобилгарди Рӯшон - Бартанг сел омадааст. Дар натиҷа роҳ баста шуда, айни замон корҳо оид ба бартараф кардани оқибатҳои офат идома доранд.

Худи ҳамин рӯз соати 19:45 шамоли шадид боми хонаи истиқоматии сокини деҳаи Делохи ноҳияи Ишкошимро канда бурдааст.

Кумитаи ҳолатҳои фавқулода ва мудофиаи гражданӣ иттилоъ медиҳад, ки дар натиҷаи офатҳои табиии 21-уми апрел қурбониён нестанд.