Бонувони зиёде барои нигоҳубини пӯсташон аз маҳсулоти соддаи ғизоӣ истифода мебаранд, ки қариб ҳамеша дар яхдон ҳастанд: сметана, бодиринг, кефир, лимон. Ва аксаран инро аз он сабаб мекунанд, ки модарон ва бибиҳои мо чунин одат доштанд. Аммо оё ин ба пӯст зарар надорад?
Бодиринг
Яке аз маъруфтарин маҳсулот дар нигоҳубини пӯсти рӯй – бодиринг аст. Бисёриҳо бодиринги резаро ба рӯй ё чашм мегузоранд, баъзеҳо аз он ниқоб омода мекунанд. Агар пӯст аз он аллергия надошта бошад ва бодиринг бо маводи зараровар коркард нашуда бошад, ба пӯст фоида дорад. Агар буридаи бодирингро аз яхдон гирифта, ба чашм гузоред, варам кам мешавад, зеро сармо рагҳои майдаро танг мекунад ва моеъи зиёдатӣ хориҷ мешавад. Ғайр аз ин, шарбати бодиринг каме таъсири сафедкунанда низ дорад.
Ниқоб аз муми занбӯр
Муми занбӯр бисёр вақт дар таркиби маҳсулоти косметикӣ истифода мешавад. Ниқобҳои саноатӣ бо муми занбӯр фоидабахшанд, зеро бо дигар моддаҳо омехта мешаванд. Вале агар танҳо мумро об карда, ба пӯсти рӯй молед, пӯстро метавонад осеб диҳад, зеро он сахт мечаспад ва канданаш мушкил мешавад. Бинобар ин, беҳтараш бо чунин таҷрибаҳо худсарона машғул нашавед.
Сметана ва кефир
Сметана яке аз беҳтарин воситаҳои хонагӣ аст. Масалан, агар пӯст аз офтоб сӯхта бошад, сметана сурхиро бартараф намуда, таъсири зиддиилтиҳобӣ дорад. Ҳамчунин, агар аз истифодаи спирт ё пилинг пӯстатон осеб дида бошад, сметана онро нарм ва зудтар барқарор мекунад.
Кефир низ ҳамин гуна таъсир дорад, аммо бештар ба пӯсти равғанин мувофиқ аст, дар ҳоле ки сметана барои пӯсти хушк беҳтар аст.
Ниқоб бо аспирин
Ниқобҳое, ки аз ҷавҳари аспирин омода мешаванд, хатарноканд. Зеро агар миқдор нодуруст бошад, он боиси аллергия мегардад. Аз чунин усулҳо беҳтараш худдорӣ кардан лозим аст.
Ниқобҳои мевагӣ
Ҷавҳарҳои мевагӣ пӯстро мулоим ва тару тоза мекунанд. Албатта, он танҳо барои онҳое тавсия мешавад, ки аллергия надоранд. Натиҷааш оддӣ аст: пӯст тару тоза ва ҳамвор мешавад.
Шавлаи ҷавдор (овсянка)
Ҷавдор як маҳсулоти арзон ва фоиданок барои пӯст аст. Агар онро бо оби ҷӯш ё шир пухта, нарм кунед, метавонед ҳамчун ниқоби хонагӣ истифода баред. Ин бештар барои пӯсти равғанин мувофиқ аст.
Сода ва намак
Ин ду маҳсулотро якҷо карда, метавон скраби хонагӣ сохт. Пас аз душ, як порча пахтаро бо об тар карда, каме собун молед ва сипас ба омехтаи сода ва намак занед. Бо он оҳиста пешонӣ, болои бинӣ ва зерманаҳро пок кунед (ё тамоми рӯйро, агар пӯст равғанин бошад). Ин ба пок шудани сӯрохиҳои калони пӯст ва пешгирӣ намудани пайдоиши доначаҳо кумак мекунад. Аммо бояд хеле эҳтиёт кард, сахт молидан мумкин нест, вагарна пӯст харошида мешавад.
Шарбати ҷаъфарӣ ва лимӯ
Ин ду маҳсулот барои сафед кардани доғҳои пигментӣ кумак мекунанд. Албатта, доғҳо пурра нест намешаванд, вале камтар намоён мегарданд. Танҳо як қатра шарбатро мустақиман ба доғ молед. Аммо агар пӯст ҳассос ё аллергия дошта бошед, ин усул хатарнок аст, зеро махсусан шарбати лимӯ метавонад сахт таъсир кунад.
