Домуллои муҳтарам. Мегуфтед, ки чӣ тавр одам мефаҳмад, ки дар дохилаш ҷин дорад ё на? Агар ҷин дошта бошад, кадом сураҳо ва оятҳои Қуръонро бихонем, то ки ҷин аз ў хориҷ шавад? Хориҷ шудани онро чӣ гуна бояд донист?
Посухи Раёсати фатвои ҶТ
Инсони мубтало ба ҷин ғолибан дорои нишонаҳоест, ки чунин аст:
-дар вақти хоб арақ мекунад ва ба зудӣ хобаш намебарад,
- шаб аз хоб бисёр тарсон мехезад,
-хобҳои тарсовар мебинад,
-дар хоб механдад, гиря мекунад ё дод мезанад.
Дар ҳолати бедорӣ бошад, шахси мубтало ба ҷин доштаро сардардии ҳамешагӣ, ки сабаби узвӣ надорад, фикрпарешонии ҳамешагӣ, танбалӣ ва дармондагӣ, дард кардани аъзое аз ҷисми инсон, монанди дил, сар, даст ё пой, ки пизишкон наметавонанд ташхис ва табобат кунанд, азият медиҳад.
Ибни Аббос ривоят мекунад, ки зане ҳамроҳи фарзандаш назди Пайғамбар (с) омада гуфт: «Ин фарзанди ман ҷинзада аст ва ҳангоме, ки мо таоми нисфирўзӣ ва шомгоҳӣ тановул мекунем, ба беморӣ гирифтор мешавад ва моро нороҳат месозад».
Пайғамбар (с) қафаси синаи он писаракро молида барояш дуо кард. Пас он тифл қай намуд ва аз шикамаш чизе мисли гўштпорае хориҷ шуд. (Муснади Аҳмад, ҷ. 1, с. 238) Барои табобати шахси ҷинзада сураҳои зайл хонда мешавад: Сураи “Фотиҳа”, оятҳои 1 то 5-уми сураи “Бақара”, “Оятул-Курсӣ”, оятҳои 285-286-уми сураи “Бақара”, сураҳои “Ёсин”, “Ториқ”, “Шарҳ”, “Кофирун”, “Ихлос”, “Фалақ” ва “Нос”. Пас аз хориҷ шудани ҷин аз бадани бемор аломатҳое, ки дар боло зикр кардем, бартараф мешаванд ва саломатии ў маълум мегардад.
